Bu gün Millət Vəkili, Vətəndaş Həmrəyliyi Partiyasının sədri Sabir Rüstəmxanlı Neftçala şəhərində seçicilərlə görüş keçirib.

Axar.az xəbər verir ki, Neftçala şəhərindən və rayonun kəndlərindən olan vətəndaşları ayrı-ayrılıqda qəbul edən millət vəkili onları dinləmiş, problemləri ilə maraqlanıb.

Bəzi vətəndaşların problemləri yerindəcə həll edilib, bəzi şikayətlər aidiyyatı qurumlara ünvanlanıb.

Görüşdə rayonun bəzi kəndlərinin yol və qazla bağlı çətinliklərinə xüsusi diqqət yetirilib. Qeyd olunub ki, qısa müddət ərzində bir neçə kəndlərdə bu problemlər yoluna qoyulsa da, bəzi kəndlərdə hələ də yol və mavi yanacaq problemi qalıb.

Millət vəkili seçicilərin diqqətinə çatdırıb ki, bu məsələ ilə bağlı hökumətə etdiyi müraciət müsbət cavablandırılıb və dövlət proqramı təsdiq edilib. S.Rüstəmxanlı bütün təkliflərin ümumiləşdirilərək, aidiyyatı təşkilatlar qarşısında məsələ qaldırılacağını bildirib.

Vətəndaşlarla söhbətdə millət vəkili pandemiya ilə əlaqədar yaranan mümkün problemlərlə də maraqlanıb, vətəndaşların qarşılaşdıqları problemlərin həllinə imkan daxilində köməklik göstəriləcəyini bildirib.