Ana səhifə Toplum |
Göyçay rayonunda avtomobillərin yüksək sürətlə hərəkət etdiyi yolun ortasında nəzarətsiz qalan azyaşlı uşağın həyatı son anda xilas olunub.
Axar.az-ın bölgə müxbiri xəbər verir ki, Baş Dövlət Yol Polisi İdarəsinin Yol Patrul Xidməti Alayının 4-cü taqımının əməkdaşı, polis baş serjantı Nicat Həmidov 99 YP 807 dövlət nömrə nişanlı “KİA Sportage” markalı xidməti avtomobil ilə hərəkət edərkən Bakı-Şamaxı-Yevlax avtomobil yolunun 214-cü kilometrliyində, Göyçayın Qarabaqqal kəndi ərazisində qəflətən qaçaraq avtomobillərin qarşısına çıxan 2 yaşlı uşağı ölümdən xilas edib.
Səhər saat 07:00 radələrində Qarabaqqal kənd sakini, 2018-ci il təvəllüdlü Hüseyn Quliyev valideynlərindən xəbərsiz evdən çıxaraq magistral yola tərəf qaçıb. Göyçay rayon sakini olan YPX əməkdaşı Nicat Həmidov azyaşlı uşağı yolda sürətlə hərəkət edən avtomobillərdən qorumaq üçün xidməti maşını ilə yolu kəsib, qarşıdan və arxadan gələn sürücüləri xəbərdarlıq işarəsi ilə saxlayıb. Polis Nicat Həmidov uşağı yolun ortasından götürərək yaşadığı evə aparıb və valideynlərinə sağ-salamat təhvil verib.
Uşağın babası Sahib Quliyev saytımıza bildirib ki, yaşadığı ev magistral yolun yaxınlığında yerləşir və o, səhər saat 07:00 radələrində mal-qaranı həyətdən çıxararaq örüş yerinə apararkən darvazanı açıq qoyub və nəzarətsiz qalan uşaq həyətdən çıxaraq avtomobil yoluna qaçıb:
“Yol polisi əməkdaşı bizim ailəni böyük bir faciədən xilas edib. Nicat Həmidovun sayəsində bu gün nəvəm Hüseyn Quliyev sağ-salamatdır. Hüseyn Quliyevə və bütün polislərə minnətdaram”.
Tarix
2020.10.20 / 00:37
|
Müəllif
Davud Tanrıverdiyev
|