Nazirlik 9 rayonun işsiz və işaxtaranları üçün əmək yarmarkası keçirəcək.

Əmək və Əhalinin Sosial Müdafiəsi Nazirliyindən Axar.az-a verilən məlumata görə, Dövlət Məşğulluq Xidməti tərəfindən təşkil edilən yarmarkaların bu həftə ərzində keçirilməsi nəzərdə tutulub.

Sentyabrın 9-da Göygöl, sentyabrın 10-da Şəki, Ağdam və Zaqatala, sentyabrın 11-də isə Abşeron, Bərdə, Balakən, Biləsuvar və Lerik rayonlarında yarmarkalar keçiriləcək. Tədbirdə qeyd olunan rayonlardakı idarə, müəssisə və təşkilatlarda olan vakant iş yerləri təklif olunacaq. Hazırda həmin boş iş yerləri barədə məlumatların toplanması işləri aparılır.

Yarmarkalar zamanı sosial müdafiəyə xüsusi ehtiyacı olan və işə düzəlməkdə çətinlik çəkən şəxslərə kvota üzrə iş yerləri də təqdim ediləcək. Tədbirlərdə əmək bazarının tələblərinə uyğun peşələr üzrə peşə hazırlığı və əlavə təhsil kurslarına, habelə ödənişli ictimai işlərə cəlb olunmaq istəyənlər qeydiyyata alınacaq.