Nazirlik hazır yaşayış binalarından alınaraq təmir edilmiş 47 mənzili müharibə əlilləri və şəhid ailələrinə verib.

Əmək və Əhalinin Sosial Müdafiəsi Nazirliyindən Axar.az-a verilən məlumata görə, nazirlik tərəfindən son iki həftədə 90-a yaxın ev müharibə əlilləri və şəhid ailələrinin istifadəsinə verilib. Bu gün isə Binəqədi rayonunun Mehdiabad qəsəbəsindəki Gənclər şəhərciyində daha 47 mənzil istifadəyə verilib.

Mənzillərin təqdim olunması zamanı nazirliyin Dövlət Sosial Təminat Xidmətinin rəisi Çingiz Əliyev bildirib ki, ilkin mərhələdə 52 rayonda 375 fərdi evin tikintisi işləri aparılıb. Ötən həftə onlardan inşası yekunlaşan 41 ev artıq istifadəyə verilib. Hazırda sifarişlə Bakıda, İmişli, Beyləqan və Şamaxıda müharibə əlilləri və şəhid ailələri üçün çoxmənzilli (ümumilikdə 238 mənzil) olan yaşayış binaları da inşa edilir.