ANS telekanalında yayımlanan "Evdəyik" verilişində qalmaqal yaşanıb.

Axar.az xəbər verir ki, aparıcı Ulvira Qarayevanın verilişdə qonaq qismində iştirak edən Elza Seyidcahanı "əməkdar artist" deyil, "maraqlı adam" kimi təqdim etməsi müğənnini özündən çıxarıb. Elza Seyidcahan aparıcıya iradını bildirərək verilişi yarımçıq tərk edib.

Əməkdar artist məsələ ilə bağlı Musavat.com-a danışarkən verilişlərdə qonaqlara hörmətsizlik edildiyini bildirib:

"Mən istəməzdim ki, bu olanlar efirə getsin. Etik qaydalara görə belə olayları efirə vermək olmaz. Efirlər artıq gizlədilməli olan şeyləri də efirə verərək reytinq qazanmağa çalışırlar. Birmənalı şəkildə bildirirəm ki, efirlərdə artıq milli dəyər deyilən amil qalmayıb.

"Əməkdar artist" fəxri adını mənə dövlət verib. Bu adı böyük çətinliklə, xeyli əziyyət çəkdikdən sonra alırıq".

Elza Seyidcahan bundan sonra verilişlərə çıxmaq istəmədiyini açıqlayıb:

"Bu cür olay mənə lazım deyildi... Özümə söz verib qarşıma şərt qoymuşam ki, bundan sonra cüzi də olsa hörmətsizliklə qarşılaşsam, heç bir söz demədən, şərh vermədən efiri tərk edəcəm. Artıq bir çox verilişdən uzaq durmağa çalışıram. Çünki bu cür verilişlərdə insanın abırı, isməti əldən gedir. Biz sənət adamıyıq, bizə belə şeylər yaraşmaz. Ya gərək həmin aparıcılarla dilləşəsən, ya da ki, verilişi tərk edəsən".