"Ermənilərin Tovuz istiqamətində yenidən fəallaşması əvvəlki illərdə olan fəallıqlarından biridir və burada hansısa qeyri-adi bir şey yoxdur".

Bu sözləri Axar.az-a hərbi ekspert Üzeyir Cəfərov Tovuzun Əlibəyli kəndi istiqamətində ermənilərin son günlər yenidən fəallaşmasını şərh edərkən söyləyib.

O, ermənilərin psixoloji təzyiq edərək yerli əhali ilə hərbçilər arasında qarşıdurma yaratmağa cəhd etdiklərini bildirib:

"Yenilik kimi qeyd edə biləcəyim hal isə ondan ibarətdir ki, Ermənistan Silahlı Qüvvələrinin ən çox çalışdıqları Azərbaycan Ordusunun bölmələrini münaqişəyə cəlb etmək, onları öz ərazilərinə dartıb salmaq və dünyaya car çəkib, haray-həşir qoparmaqdır ki, qoymayın, Azərbaycan Ordusu ərazimizə basqın edib. Bütün bunları mütləq mənada nəzərə almaq lazımdır. Sözsüz, Tovuz rayonu ərazisindəki hərbi hissəmizin komandanlığı gözəl anlayır ki, ermənilərin ən çox çalışdıqları məhz bizi təxribata cəlb etməkdir. Yerdə qalan məsələlər isə adi qaydada baş verən hadisələrdir. Atəşkəsin pozulması, hərbçilərlə yanaşı mülki şəxsləri də daim atəşə məruz qalması, əsgərlərimizlə mülki şəxslər arasında narazılıq yaratmaq onların hədəfində duran əsas məsələlərdən biridir. Şəxsən mən hansısa ciddi narahatçılığa əsas görmürəm. Amma ehtiyatı da əldən vermək olmaz".

Qeyd edək ki, Ermənistan ordusu iyulun 26-da Tovuzun Əlibəyli istiqamətində atəşkəsi ciddi şəkildə pozub. Nəticədə iki mülki şəxs yaralanıb. Azərbaycan Silahlı Qüvvələrinin rəhbərliyi erməni hərbi birləşmələrinin Əlibəylini atəşə tutmaqla bərabər, Ağdam-Goranboy istiqamətində də diversiya kəşfiyyat hücumu həyata keçirdiyini bildirib. Diversiya əməliyyatınınq arşısı alınıb və ermənilər itki verərək, geri çəkilib.

Ermənictan Müdafiə Nazirliyi bir əsgər itirdiklərini, iki nəfərin isə yaralandığınpı qeyd edib. Hərbi mənbələrdən əldə etdiyimiz məlumatda isə qeyd olunur ki, Ermənistan Silahlı Qüvvələri 2-si zabit olmaqla, 3 hərbçisini itirib.