Yazıçı Kamal Abdulla "Bir abzas - yeddi rəng" layihəsində.

Altıncı rəng – Boz

Ömər Xəyyam:

- Ədəbiyyatın müstəqillik illərində yaşadığı susqunluğu, qaranlığı Kamal Abdulla qələmi canlandırdı. Dili ilə, forması ilə əsərləri yeni ruh gətirdi ədəbi auraya. "Yarımçıq Əlyazma"nı götürüb ədəbiyyatın ayaqlarından başına qədər qorxmadan, çəkinmədən, cəsarətlə getmək olar. Bir abzasa sığdırılacaq qədər kiçik olmasa da, yeni abzasdan yazılacaq dahidir.

Günel Eyvazlı:

Sirr, labirint, gizli, sehrbaz, unutmaq... Əgər hekayələrdə cərəyan edən hadisələri də bu silsiləyə əlavə etsək, o zaman ardıcıllığı sonsuzluğa qədər davam etdirə bilərik. Bəzən hər şey qordi düyünü qədər açılmaz, çözülməz görünür insana. Yalnız mətnə hazırlıqlı olduğun təqdirdə labirintdən çıxa bilirsən. Dolaşıqlıq içində səni aydınlığa çıxaran, sənə yol göstərən işıq beynində yaranmış qarmaqarşıqlığın qarşısına sədd çəkir. Nəhayət ki, müəllifin nə demək istədiyini anladım kimi sözlərlə özünə təskinlik verirsən. İntellekt yağışı, düşüncə yağışı səni büsbütün isladaraq ağuşuna alır. Kamal Abdulla dünyanın görünməyən tərəflərini qarşımızda açmağa çalışır. Ən xırda detallara qədər çözməyi, aydınlaşdırmağı qarşısına məqsəd qoyur. Onun bəsirət gözündən dünyaya baxmaq və kəşflərinə şahid olmaq bilim adamlarına böyük həzz və heyranlıq bəxş edir. Duyğulandırırmı? Düşündürür və bu vaxta qədər gördüklərini görmədiyin üçün səni heyfisilənməyə məcbur edir. Bu kəşfə səndən öncə Kamal Abdulla imza atıb. Və hər sətrində "gözlərini aç, həyatı olduğu və olmadığı kimi görməyə çalış" deyir. Hər kəs axtardığını tapır. Mən isə sətirlərdə özümü tapıram... "Ona əyan oldu ki, bu evsiz-eşiksiz, keçmişi və gələcəyi məhv olmuş iztirablı adamlarla onu birləşdirən bir sirr var. Amma sirrin özü nədən ibarət idi – bunu hələ bilmirdi. Dumanlı bir şəkildə ancaq bunu duya bildi ki, elə bil, o da, bu adamlar da dünyanın heç bir başqa məxluquna bəlli olmayan son dərəcə vacib bir məlumata malikdirlər..."

P.S. Kamal Abdullanın hekayələrindən ibarət "Sirri–Zəmanə" adlı yeni kitabını "Kitab Klubu" (Mustafa Sübhi 13), "Bukinist" (İstiqlaliyyət küç. 69H), "Kitabevim.az" Kitab Evi ("AK Center", 2-ci mərtəbə), "Əli və Nino" kitab dükanlarından, "Bayatı" kitab satış mərkəzindən, "Xan Xəzinəsi" kitab dükanlarından, "Papirus" Kitab Evindən, Prezidentin İşlar İdarəsinin Kitab Evindən, Akademiya Kitab Mərkəzindən, Akademkitabdan əldə etmək olar.

Əvvəlki Abzaslar:

Bir abzas: Qan Turalıdan Kamal Abdullaya. Birinci rəng - Ağ

Mövlud Mövlud və Kəramət Böyükçöldən - Bir abzas. İkinci rəng – Qırmızı

Kənan Hacı və Aqşin Evrəndən - Bir abzas. Üçüncü rəng - Yaşıl

Səlim Babullaoğlu və Zahir Əzəmətdən – Bir abzas. Dördüncü rəng - Mavi

İradə Tuncaydan Kamal Abdullaya – Bir abzas. Beşinci rəng - Sarı