Ana səhifə Planet |
11 sentyabr hadisələrindən sonra ABŞ tərəfindən qara siyahıya salınan Səudiyyə Ərəbistanı vətəndaşı Yasin Əl Qadi 13 il sonra bu siyahıdan çıxarılıb.
Axar.az xəbər verir ki, ABŞ Maliyyə Nazirliyi 11 sentyabr
hücumlarıyla əlaqəli olduğu şübhəsilə 2001-ci ildə qara siyahıya
saldığı 59 yaşlı Qadinin heç bir sübut olmadığına görə bu siyahıdan
çıxarıldığını açıqlayıb.
Türkiyənin "Hürriyyət" qəzetinə açıqlama verən nazirlik Yasin Əl
Qadinin 2012-ci ilin dekabrında müraciəti əsasında istintaq
başlandığını, lakin heç bir dəlil tapılmadığını bildirib.
Xatırladaq ki, Yasin Əl Qadi 11 sentyabr hadisələrindən sonra ABŞ-ın dünyanın dörd tərəfində axtardığı şəxslərdən biridir.
Adı Əl Qaidəyə aktiv yardım edən iş adamları arasında hallanan Yasin Əl Qadi 1955-ci ildə Qahirədə doğulub. Səudiyyə Ərəbistanı vətəndaşı və iş adamı olan Qadi 11 sentyabr hadisələrindən sonra Buş Administrasiyası tərəfindən 12 oktyabr 2001-ci ildə terrora dəstək verdiyi bildirilərək axtarışa verilmişdi.
Beş gün sonra, 17 oktyabr 2001-ci ildə BMT Təhlükəsizlik Şurası, iki gün sonra isə Avropa Birliyi Əl Qadini qara siyahıya salmışdı. Ancaq bu qərarların ardından səudiyyəli iş adamı vəkilləri vasitəsi ilə uzun sürən hüquqi müstəvidə mübarizə apararaq öncə 2010-cu ildə Avropa Birliyinin, daha sonra 2012-ci ildə BMT-nin qara siyahısından çıxmağı bacarmışdı.
Tarix
2014.11.26 / 23:36
|
Müəllif
Şəmsəddin Ənsar
|