Azərbaycan Respublikasının Prezidenti yanında Gənclər
Fondunun dəstəyi ilə "24 kadr" adlı film festivalı keçirilib,
2013-cü il dekabrın 20-sində isə "Metropark" Ticarət və Əyləncə
Mərkəzində yerləşən "Park Cinema"da Gənclər Fondunun maliyyə
dəstəyi ilə festivalın mükafatlandırma mərasimi baş
tutub.
Layihənin rəhbəri Binəqədi Rayon İcra Hakimiyyəti başçısının
müavini Aygün Əliyeva olsa da, bütün təşkilati işləri Azərbaycan
Tələbə Gənclər Təşkilatları İttifaqı (ATGTİ) sədrinin müşaviri
Cəmil Hüseynov yerinə yetirib.
"Axar.az"ın film festivalının təqdimat
mərasimindən hazırladığı reportajdan sonra saytın mail ünvanına
çoxsaylı oxucu-iştirakçı şikayətləri daxil olub. Bunların hər biri
ilə maraqlandıq. Öncəki yazımızda qaliblərin "ən yaxşı ssenari",
"ən yaxşı aktyor" və "ən yaxşı operator" işinə görə vəd olunan 100
AZN məbləğində pulun onlara verilməməsi ilə bağlı etdiyi
şikayətlərə aydınlıq gətirməyə çalışmışdıq. Bununla əlaqədar Cəmil
Hüseynov bildirmişdi ki, büdcə çatışmazlığından həmin o pul mükafat
ləğv olunub. Biz də layihəyə nə qədər qrant ayrılması və o məbləğin
hansı işlərə xərclənməsi ilə bağlı kiçik araşdırma apardıq.
Azərbaycan Respublikasının Prezidenti yanında Gənclər Fondu ilə
əlaqə saxladıq və onlar da "24 kadr" film festivalı layihəsinə 6800
AZN pul ayrıldığını dedilər. Daha sonra Cəmil Hüseynovun
fikirlərini öyrəndik. O, bildirdi ki, bu işlərlə layihənin rəhbəri
məşğul olub:
"O məlumatlar layihənin rəhbərindədir. Mən, sadəcə, təşkilati
işləri həyata keçirmişəm. Məlumatlar Aygün xanımdadır, amma məncə,
o məlumatlar xidməti informasiyalardır və mətbuata açıqlana bilməz.
Layihənin rəhbəri olmadığıma görə, bununla bağlı məlumatım yoxdur.
Mən ancaq tədbirin keçiriləcəyi yerin tutulması, filmlərin
toplanması kimi təşkilati işlərlə məşğul olmuşam. Onlara pulu mən
verməmişəm, ümumiyyətlə, maliyyə məsələləri ilə bağlı bütün işlərlə
layihənin rəhbəri məşğul olub".
Aygün Əliyeva ilə əlaqə saxlamağa çalışsaq da, uzun müddət
telefonlara cavab vermədi, daha sonra telefonu uzun sürəlik
qapadıldı. Binəqədi Rayon İcra Hakimiyyəti ilə əlaqə saxladıq.
Telefonu götürən şəxs növbətçi olduğunu, Aygün xanım da daxil
olmaqla bütün rəhbərliyin tədbirdə iştirak etdiyini bildirdi.
Araşdırmamızı davam etdirəcəyik.