"Biz İsa Hüseynova, Eldar Quliyevə minnətdar olmalıyıq".

Bu sözləri kinoşünas Aydın Kazımzadə "Nizami" filminin çəkilişinin 33 illiyi münasibətilə Axar.az-a danışarkən deyib:

"Əgər kimsə "Nizami" filminin səs salmadığını deyirsə, yanılır. Bu filmin çəkilməyi ilə bütün dünya bildi ki, Nizami Azərbaycanındır. Nizami Gəncəvi dahi şairdir, filosofdur. "Babək", "Nəsimi" filmləri ilə bu filmi müqayisə etmək doğru deyil. Axı Nizami Gəncəvinin tərcümeyi-halı yoxdur. O yazır ki, əgər mənim kim olduğumu bilmək istəsəniz, şeirlərimi, poemalarımı oxuyun.

Biz İsa Hüseynova, Eldar Quliyevə minnətdar olmalıyıq ki, bu cür film çəkiblər. Müslüm Maqomayev bu gün yoxdur, amma "Nizami" filmində yaşayır. Filmdə Üzeyir Hacıbəyovun "Sevgili canan"ınını da oxuyur. Onu birinci dəfə Bülbül, sonra Rəşid Behbudov oxumuşdu. Mən "filan film zəifdir, filan film güclüdür" fikri ilə razılaşmıram. Çünki hər filmin öz ideyası, məqsədi var. Filmdə Nizami əsərləri əsasında açılır, Gəncə həyatı açıq-aşkar göstərilir. Çox ağır, gözəl filmdir".

Qeyd edək ki, bu gün "Nizami" filminin ilk baxış tarixindən 33 il ötür.