Rusiya Federal Təhlükəsizlik Xidməti (FSB) Moskvada terror hücumu planlaşdıran İŞİD üzvlərinin həbsi anını göstərən video yayımlayıb.

Axar.az xəbər verir ki, videoda şübhəlilərin partlayıcını paltaryuyan maşında gizlətdiyi görülür. Bomba parçaları olduğu təxmin edilən obyektlər hamamda müəyyən edilib. Partlayıcının təxminən 5 kiloqram TNT gücündə olduğu ifadə edilib. Terror hücumunun Moskvadakı ictimai nəqliyyat vasitələrində təşkil edilməsi planlaşdırılırmış.

Nəzarətə götürülənlərdən bir qisminin Şimali Qafqazda doğulan Rusiya vətəndaşı olduğu, aralarında bəzilərinin İŞİD düşərgələrində təlim keçdiyi bildirilib. Şübhəlilərin Suriyadakı rus hava əməliyyatından çox əvvəl məmləkətlərinə qayıtdıqları qeyd edilib.

Hadisə ilə bağlı 3 cinayət üzrə (terror aktına hazırlıq, qeyri-qanuni partlayıcı maddələr saxlama və partlayıcı istehsalına hazırlıq) istintaq başladılıb.