20 Yanvar faciəsinin 26-cı ildönümünün hazırlıqları başlanıb.

Axar.az xəbər verir ki, Bakı Şəhər İcra Hakimiyyəti rəhbərliyinin tapşırığı ilə tədbirlər planı hazırlanıb.

Hazırda Şəhidlər Xiyabanı və 20 Yanvar dairəsindəki abidə kompleksində təmizlik işləri gedir. Meriyanın 50-dən çox əməkdaşı Xiyabana cəlb edilib.

BŞİH əməkdaşları on minlərlə qərənfili seçir, başlarını kəsir, saplaqlarını isə ayrıca bir yerə yığırlar. Buna səbəb ənənəvi olaraq qərənfillərdən kompozisiyalar hazırlanmasıdır.

İməcilik qrupuna rəhbərlik edən BŞİH əməkdaşı Soltan Əliyev "Hafta.az"a deyib ki, işlər ayın 17-si bitəcək: "Əgər havalar soyuq keçəcəksə, uzaqbaşı kompozisiyaların tamamlanması yanvarın 18-də, günorta saatlarında başa çatacaq".

Qeyd edək ki, bu gün Bakı Şəhər İcra Hakimiyyətinin başçısı Hacıbala Abutalıbov prosesin gedişatına nəzarət etmək üçün Şəhidlər Xiyabanına gəlib.