İranın neft bazarlarına qayıtması qiymətlərə təzyiqi artıracaq.

Axar.az xəbər verir ki, bu, "Mudi" beynəlxalq reytinq agentliyinin yaydığı məlumatda yer alıb.

"İran hazırda hasilatı artırmaqla bağlı müəyyən texniki problemlər yaşayır. Köhnəlmiş infrastrukturun modernizasiya olunması üçün 150-200 milyard dollar lazımdır. İranın 2016-cı ildə hasilatını 500 min barrel artırması gözlənilir. Bu, qiymətlərə təzyiqi artıracaq", - agentliyin məlumatında bildirilib.

Qeyd edək ki, bu il yanvarın 16-da Qərb İrana qarşı sanksiyaları ləğv edib. Rəsmi Tehran bazarlarda mövqeyini gücləndirmək üçün neft hasilatını artıracağını bildirib.

Fevralın 16-da isə Səudiyyə Ərəbistanı, Rusiya, Venesuela və Qətər neft hasilatını 11 yanvar 2016-cı il səviyyəsində saxlamaq barədə razılaşıb. Venesuelanın Neft naziri Euloxio Pino Ekvador, Nigeriya, Əlcəzair, Oman və Küveytin bu qərarı dəstəklədiyini açıqlayıb. İran isə hasilatı dondurub-dondurmayacağını açıqlamadan sazişi dəstəklədiyini bildirib.

Birjalarda neftin qiyməti 2014-cü ilin iyulundan ucuzlaşmağa başlayıb. Ucuzlaşmanın başlıca səbəbi kimi isə hasilatın çoxluğu göstərilir.