Millət vəkili Aydın Mirzəzadə bu gün Qərbi Kaspi Universitetinin politologiya fakültəsinin 4-cü kurs tələbələrinə Fəxri Xiyabanda dərs keçib.

Onun bu addımı ətrafdakı insanların, tələbələrin və sosial şəbəkə istifadəçilərinin marağına səbəb olub.

Məsələ ilə bağlı Kult.az-a danışan təhsil eksperti Kamran Əsədov bildirib ki, bu metoddan dünyanın nüfuzlu beynəlxalq universitetlərində istifadə olunur:

“Təhsil qanunvericilik aktlarında da tövsiyə olunur ki, şagird və tələbələrə keçirilən mövzu, öyrədilən şəxs haqqında məlumatlar əyani şəkildə göstərilsin ki, onlar əldə etdikləri informasiyanı daha yaxşı mənimsəyə bilsinlər. Mövzuya uyğun olaraq, Fəxri Xiyabanda tədrisin qurulması çox müsbət haldır. Hesab edirəm ki, bu təcrübədən digər universitet və mütəxəssislər də istifadə edəcək. Çünki Fəxri Xiyabanda dəfn olunanlar ölkə tarixində müstəsna xidmətləri olan şəxslərdir. Bu canlı dərs çox effektiv nəticə verəcək”.

Ekspert qeyd edib ki, tələbələrə keçirilən mövzuların müvafiq yerlərdə, tarixi abidə və məkanlarda təşkil olunması nəticəyönümlü addımdır.