Keçmiş polkovnik Sergey Skripalın zəhərlənməsi ilə bağlı Londonun göstərdiyi təzyiqlərə Moskva cavab tədbirləri hazırlayır.

Axar.az xəbər verir ki, bu sözləri Rusiya Federasiya Şurasının rəhbəri Valentina Matviyenko deyib.

“Biz Londonu yerində oturdacaq cavab tədbirləri hazırlamışıq. Əgər yenidən təzyiqlər davam etsə, biz bilirik nə edəcəyik”, - şura sədri bildirib.

O əlavə edib ki, Rusiyanın Londona cavab həmlələri Böyük Britaniyanı Kimyəvi Silahların qadağan edilməsi Təşkilatına müraciət etməyə vadar etdi.

Qeyd edək ki, martın 5-də Rusiya Hərbi Kəşfiyyat İdarəsinin keçmiş polkovniki Sergey Skripal və onun qızı Yuliya huşsuz və ağır vəziyyətdə Britaniyada parkların birində tapılıb. Britaniya Sergey Skripal və qızının zəhərlənməsi olayında Rusiyanı ittiham edib.

Böyük Britaniyanın olaya görə 23 rus diplomatın ölkədən departasiya olunacağını açıqlamasının ardından Rusiya da 23 ingilis diplomatını qovacağını bəyan edib.