Qazaxıstan və Türkiyə münasibətləri yüksələn trayektoriya ilə inkişaf edir, lakin pantürkizmlə bağlı səsləndirilən fikirlər fərziyyədir.

Axar.az xəbər verir ki, bunu jurnalistlərə açıqlamasında Qazaxıstanın Xarici İşlər naziri Erlan İdrisov deyib.

"Bizim münasibətlərimiz çox yüksəkdir. Təbii ki, Türkiyə ilə mədəni-tarixi aspektlər xüsusi rol oynayır. Burada heç bir pantürkist yanaşmadan söhbət gedə bilməz. Mətbuatda tez-tez belə fərziyyələr səsləndirilir. Pantürkizm reallıq deyil, reallıq bizim qədim qohum olmağımızdır", - İdrisov bildirib.

İdrisovun sözlərinə görə, müasir türklər Altayı öz vətənləri hesab edirlər və bu da Türkiyə ilə münasibətlərə təsir göstərir:

"Türkiyə Qazaxıstanın siyasi və iqtisadi aspektdə əsas partnyorudur. Siz bilirsiniz ki, Türkiyə müstəqilliyimizin ilk illərində iqtisadiyyatımızın yenidən formalaşdırılmasında bizə ciddi kömək edən ölkələrdəndir. Buna görə də türk təcrübəsi bizə çox lazımdır".