Ötən gün Sumqayıt şəhərində Əli Eminlinin fərdi layihəsi əsasında Azərbaycan Respublikasının Prezidenti yanında Gənclər Fondunun maliyyə dəstəyi, "Sağlam Düşüncə" Gənclər Təşkilatı, Sumqayıt Gənclər və İdman Baş İdarəsi və Sumqayıt Gənclər Evinin təşkilati dəstəyi ilə "Ani Fantaziya" Rəsm Festivalı keçirilib. Festival müsabiqə xarakterli olub.

Axar.az xəbər verir ki, layihənin əsas fərqli cəhəti mövzunun festival gününə qədər açıqlanmamasıdır, yəni gənclərin çəkəcəyi rəsmlərin mövzusu həmin an, daha dəqiq desək, açılış mərasimindən sonra açıqlanıb.

Müsabiqədə hazırda bütün dünyada və ölkəmizdə aktual olan - "Multikulturalizm, Sülh və Tolerantlıq" mövzusu seçilib. Bu mövzunun seçilməsinin səbəbi isə bu il ölkəmizdə "Multikulturalizm ili" olmasıdır.

Layihədə istifadə olunan rəsm ləvazimatları iştirakçıların özlərinə hədiyyə olunub.

"Ani Fantaziya" Rəsm Festivalının əsas məqsədi istedadlı gənclərin öz bacarıqlarını, fantaziya və yaradıcılıqlarını göstərə biləcəkləri bir mühitin yaradılması, həmin gənclərin özləri kimi istedadlı gənclərlə əlaqə qurması və yeni dostluqlar qazanması, onların əl işlərinin sərgilənməsi və gənclər arasında incəsənətin təbliğidir.

Qeyd edək ki, iştirakçıların əl işlərini tanıtması üçün 20 noyabr 2016-cı ildə, saat 10:00-da Sumqayıt Gənclər Evində sərgi keçiriləcək. Sərgidən əlavə isə sosial şəbəkələrdə əldə edilmiş müəyyən auditoriyaya həmin rəsmlər tanıdılacaq.