"Azərbaycanın irimiqyaslı beynəlxalq tədbirləri təşkil etmək üçün böyük təcrübəsi var".

Bu barədə Axar.az-a açıqlamasında Gürcüstanın "Avroviziya" komandasının rəhbəri Natiya Uznadze deyib. O, Bakıda keçiriləcək Birinci Avropa Oyunlarının yüksək səviyyədə təşkil olunacağına inandığını bildirib:

"Bakını çox sevirəm və Azərbaycanda dəfələrlə olmuşam. Çox qonaqpərvərsiniz. Avropa Oyunlarının Bakıda keçiriləcəyini öyrənəndə çox məmnun oldum. Bildiyimə görə, Avropa Oyunları iyunun 12-dən 28-dək davam edəcək və yarışlara 48 ölkənin nümayəndəsi qatılacaq. Azərbaycan artıq yeni tikilmiş stadionu, idman şəhərciyi ilə qonaqlarını qəbul etməyə hazırdır. Bu çox ciddi hadisə olmasına baxmayaraq, əminəm ki, siz onun öhdəsindən ən yüksək səviyyədə gələcəksiniz. Çünki Azərbaycanın irimiqyaslı beynəlxalq tədbirləri təşkil etmək üçün böyük təcrübəsi var. Bu mənada 2012-ci ildə Bakıda keçirilən "Avroviziya" yarışmasını xatırlayıram. Mən Avropa Oyunlarının da yüksək səviyyədə təşkil ediləcəyinə əminəm və bu, Azərbaycanın növbəti uğuru olacaq".