"Avropa Oyunlarının Azərbaycanda keçirilməsi bizim müstəqillik tariximizdə əldə etdiyimiz nailiyyətlərin ən uca zirvəsidir".

Bu sözləri Axar.az-a Yeni Azərbaycan Partiyası (YAP) Gənclər Birliyinin sədri Seymur Orucov söyləyib.

O, "İlk Avropa Oyunlarına sən də qoşul" layihəsi çərçivəsində Birinci Avropa oyunları ilə bağlı YAP Gənclər Birliyinin təşkil edəcəyi tədbirlərdən söhbət açıb:

"Təbiidir ki, bununla bağlı YAP gənclərinin bir çoxu könüllü kimi bu oyunlarda iştirak edirlər. Bəziləri isə Bakı-2015 Avropa Oyunlarının Əməliyyat Komitəsində (BEGOC) işləyirlər. Biz Avropa oyunları ilə bağlı bir çox flaşmobları, Park Bulvarda müəyyən layihələri keçirməyi nəzərdə tutmuşuq. Bundan başqa Velosiped Federasiyası ilə birgə mayın 30-u veloyürüş təşkil etməyi planlaşdırmışıq. "Səs", "İki Sahil" qəzeti ilə birgə mütəmadi olaraq bizim dəyirmi masalarımız həyata keçirilir. Sadaladıqlarımın hamısı "İlk Avropa Oyunlarına sən də qoşul" layihəsi çərçivəsində həyata keçirilir. Avropa Oyunlarının Azərbaycanda keçirilməsi dövlətimiz, gənclərimiz üçün böyük bayramdır. Mən inanıram ki, biz iyunun 12-də Bakıda baş tutacaq ilk Avropa Oyunları ilə yenidən tarix yazacağıq".