Bu ay yeni eranın başlanması qeyd olunur: İyunun 12-də Azərbaycanın paytaxtı Bakıda Birinci Avropa Oyunları baş tutacaq. Bu təntənəli idman festivalına 6 mindən çox idmançı qatılacaq.

Axar.az xəbər verir ki, bunu dünyanın nüfuzlu CNN kanalı Bakıda keçiriləcək I Avropa Oyunlarına həsr olunmuş yazısında qeyd edib.

"2012-ci ilin dekabrında Avropa Olimpiya Komitəsinin (AOK) üzvləri Romada Baş Assambleya iclasında baş tutan görüşdə səsvermə zamanı qəbul olunan qərara görə, sözügedən idman festivalı hər dörd ildən bir keçiriləcək.

49 AOK üzvündən 38-i Asiya və Panamerika oyunlarının Avropa ekvivalenti olan və 1951-ci ildən yer alan oyunların keçirilməsini dəstəkləyib.

50 müxtəlif Avropa xalqının nümayəndələri iyun ayının 12-dən başlayaraq 28 iyun – festivalın bağlanma mərasiminə qədər mübarizə aparacaqlar. Komitə bildirib ki, Avropa Oyunları Olimpiya oyunlarının eynisi deyil və oyunların əsas məqsədi idmana olan marağı artırmaqdır.

Birinci Avropa Oyunlarında hansı idman növləri təmsil olunacaq?

Olimpiya Komitəsi təkliflərə baxdıqdan sonra oyunlarda təmsil olunacaq idman növlərini müəyyən edib. İdman festivalında 20 idman növü təmsil olunacaq. Onlardan 4-ü bu festivalda debüt edəcək.

Yarışlarda təmsil olunacaq idman növləri bunlardır: Su idmanı növləri, oxatma, atletika, badminton, cüdo, voleybol, boks, avarçəkmə, velosiped yarışı, qılıncoynatma, gimnastika, atıcılıq, stolüstü tennis, taekvando, triatlon və güləş.

Bəs debütünü edəcək "yeni" idman növləri hansılardır? Budur onlar: basketbol, çimərlik futbolu, karate və sambo. İlk üçü, yəqin ki, hər kəsə aydındır. Bəs sambo nədir? Bu idman növü yarışda necə təmsil olunacaq?

Sambo, kökü SSRİ hərb tarixinə dayanan idman növüdür ki, Azərbaycan özü də bir zamanlar bu ittifaqın tərkibində olub.

Bu döyüş növü 1920-ci ildə Qırmızı Ordu əsgərlərinin döyüş bacarığını yüksəltmək üçün istifadə olunan əlbəyaxa idman növü elementidir. Bu idman növündə həm güləş, həm də cüdonun elementləri var, amma qaydalar müəyyən qədər fərqlidir. Və sözügedən idman növünün rus dilindəki adının verdiyi məna "silahsız özünümüdafiə"dir.

Biz, yəqin ki, bu yarış növündə ən yaxşı çıxışları Rusiyadan görəcəyik.

İdmançılar üçün hansı güzəştlər nəzərdə tutulub?

Güzəştlər iki cürdür: öz ölkəsi üçün medal qazanmaq və 2016-cı ildə baş tutacaq Rio Olimpiya oyunlarına iştirakçı hüququ əldə etmək.

Bakı 253 mükafata mərasim təşkil edəcək.

Biz Bakı haqqında nə bilirik?

Biz bilirik ki, Rusiya və Türkiyənin Avropa Oyunlarına ev sahibliyini təşkilatçılığını etmək niyyətləri olduğu barədə ilkin fikirləri var idi, amma Azərbaycan tək iddiaçı oldu. Təxminən 2,5 milyon əhalisi olan Bakı bunu diqqət mərkəzində saxladı və bu məsuliyyətli işi öz üzərinə götürdü.

Bakı Cənubi Qafqazın ən böyük şəhəridir, Xəzər dənizinin sahilində yerləşir, Şərq və Qərbi özündə birləşdirir, neft və qazla zəngindir və zəngin sərvətləri var. Bakı həmçinin parlaq ofis tikililərinə, böyük işıqlı bulvara və elit mağazalara sahibdir.

Bakıya diqqətlə baxsanız, parıltının əsas mənbəyini – qədim İçərişəhəri də görə bilərsiniz. XII əsrə aid olan bu qədim şəhər YUNESKO-nun dünya irsinə daxildir. Qədim qala divarlarının ətrafı isə sahil xətti və Bakı küləyi ilə öz gözəlliyini tamamlayır.

Azərbaycan Birinci Avropa Oyunlarına ev sahibliyi etməklə nə əldə edəcək?

İdman naziri Azad Rəhimovun "Qardian" qəzetinə verdiyi müsahibədə dediyi kimi, "Mühüm olan bizim ölkəmizin dünya xəritəsində və Avropa xəritəsində mövqeyini yaxşılaşdırmaqdır".

"Bunun ən yaxşı yolu idman və mədəniyyət sahəsində əlimizdən gələni etməkdir. İdman çoxsaylı insanları birləşdirmək üçün böyük potensialdır".

Qeyd edək ki, 2019-cu ildə baş tutacaq İkinci Avropa Oyunlarına Hollandiya ev sahibliyi edəcək.