İlkin mərhələdə qalib gəlib dörddəbir final mərhələsinə adlayan Azərbaycan taekvondoçuları Fəridə Əzizova (-67 kq) və Milad Beigi Harçeqani (-80 kq) döyüş təəssüratlarını bölüşüb.

Axar.az xəbər verir ki, Fəridə Əzizova birinci döyüş olduğu üçün mübarizənin bir qədər çətin olduğunu bildirib:

"Çünki birinci döyüş digər döyüşlərə nisbətən həmişə mürəkkəb olur, idmançı tam açılışmır. Əlbəttə, Azərbaycan arenasında döyüşmək, azarkeşlərin alqış sədası altına mübarizə aparmaq daha ruhverici oldu və qələbə gətirdi. Hər bir idmançı tatamiyə udmaq və dövlətinə qələbə qazandırmaq üçün çıxır. Mən əlimdən gələni edəcəyəm".

İdmançımız Avropa Oyunları ilə bağlı təşkilati işlərin çox yüksək səviyyədə təşkil olunduğunu deyib:

"Hər şeyin ideal keçirilməsi üçün bütün işlər görülüb. Ölkəmizdə bütün idmançılara, o cümlədən taekvondoçulara xüsusi qayğı var. Bildiyiniz kimi Avropa Oyunları ilk dəfə bizim vətənimizdə keçirilir, yarışlarda qalib gəlməklə bütün dünyaya Azərbaycan taekvondoçularının gücünü göstərə bilərik".

Milad Beigi Harçeqani isə qeyd edib: "Şadam ki, ilk mərhələdə böyük hesabla qalib gəldim. Tamaşaçıların dəstəyi bizə yüksək ruh verir. Bizə dəstək olan hər kəsə təşəkkürümü bildirirəm".

İndiyədək London-2012 Yay Olimpiya Oyunlarının bürünc medalçısı Böyük Britaniyalı Lutalo Muhammadlə heç bir döyüşdə qarşılaşmadığını deyən B.Milad qızıl medal qazanmağa var qüvvəsi ilə çalışacağını dedi: "İnşallah yaxşı olar, birinciliyi əldə edərəm".