Finala yüksələn Azərbaycan taekvondoçusu Fəridə Əzizova (-67 kq) qızıl medalın bir addımlığında isveçli Elin Yohansonla keçirdiyi yarımfinal döyüşü barədə təəssüratlarını bölüşüb.

Axar.az xəbər verir ki, Fəridə Əzizova Avropa Oyunlarına Yanvarın 5-dən hazırlaşdığını deyib:

"Bundan öncə dünya çempionatında və bir neçə turnirdə iştirak etməyimə baxmayaraq biz artıq keçən ildən bilirdik ki, ölkəmizdə ilk Avropa Oyunları keçiriləcək. Hər bir yarış öz yerində, amma psixoloji olaraq bu yarış üçün xüsusi hazırlaşırdım. İnanırdım və özümə söz vermişdim ki, əz azından final döyüşünə qədər gedib çıxacağam. Onu deyə bilərəm ki, artıq finaldayam və özümlə, mənə dəstək olan xalqımla qürur duyuram. Azarkeşlərə öz təşəkkürümü bildirirəm, arenaya çıxanda gurultulu alqışlarla mənə güc verib dəstək oldular. Bu artıq rəqiblərə psixoloji olaraq təsir göstərir və döyüşdən qalib çıxıram.

F.Əzizova onu da qeyd edib ki, yarımfinaldakı isveçli rəqibi reytinqdə birinci olsa da, onunla bir neçə dəfə qarşılaşdığından Yohansonun taktikasına bələd olub: "Dörddəbir finalda türk idmançısı Nur Tatara nisbətən isveçli idmançı ilə yarışım mənə daha asan gəldi".

O, türkiyəli idmançı ilə yarışından danışıb: "Eyni çəki dərəcəsində döyüşsək də, heç vaxt qarşılaşmamışıq. Son 1 ay ərzində mübarizə aparmışıq. Türkiyə bizə dost ölkədir, Nur Tatarla mənim də dostluq münasibətim var. Onunla mübarizə mənə daha çətin oldu. Dünya və Avropa çempionudur".