Xəbər verdiyimiz kimi, Prezident İlham Əliyevin müvafiq sərəncamı ilə Rövşən Rəhim oğlu İsmayılov Ədliyyə Akademiyasının rektoru təyin edilib.

Axar.az Rövşən İsmayılovun dosyesini təqdim edir:

O, 1971-ci il mayın 8-də Bakı şəhərində anadan olub. 1994-cü ildə Bakı Dövlət Universitetinin Hüquq fakültəsini bitirən Rövşən İsmayılov 1994-cü ildən BDU-nun Konstitusiya hüququ kafedrasının müəllimi, 2006-cı ildən dosenti olub.

1995-ci ildə qəbul olunmuş Azərbaycan Konstitusiyasının Hazırlanması Komissiyasının işçi qrupunun üzvü kimi fəaliyyət göstərib.

R.İsmayılov 2000-ci ildə Odessa Milli Hüquq Akademiyasında hüquq elmləri namizədi alimlik dərəcəsi alıb. Elmi işinin mövzusu "Azərbaycan Vətəndaşlıq İnstitutu" olub.

1996-2001-ci illərdə Avropa İnsan Hüquqları Mərkəzi (Bakı) Şurasının üzvü olub.

1997-ci ilin fevralından 2003-cü ilə kimi Xəzər Universitetində müəllim işləyib.

2002-ci ilin fevral-iyun aylarında ABŞ-ın İndiana Universitetində elmi məzuniyyətdə olub.

2005-ci ilin yanvar-avqust aylarında Fulbrayt proqramı üzrə ABŞ-ın İndiana Universitetində elmi tədqiqat aparıb.

2006-cı ilin fevral ayında Milli Məclisin qərarı ilə Mərkəzi Seçki Komissiyasının üzvü təyin olunub. 2008-2017-ci illərdə Avropa Şurasının İrqçilik və Dözümsüzlüyə qarşı Komissiyasının (ECRI) üzvü olub.

22 iyun 2010-cu ildə Prezidentin təqdimatı əsasında Milli Məclisinin qərarı ilə Konstitusiya Məhkəməsinin hakimi vəzifəsinə təyin olunub.

2017-ci ildən Avropa Şurası Venesiya Komissiyasının üzvüdür.