Ermənistan və ABŞ adından “Tramp yolu” haqqında verilən birgə bəyanat sülh prosesinin digər fundamental sənədidir.

Axar.az xəbər verir ki, bunu Ermənistanın Baş naziri Nikol Paşinyan hökumət iclasında deyib.

O bildirib ki, bu, 8 avqust 2025-ci il tarixli bəyanatdan sonra atılan növbəti vacib addımdır, bu bəyanat sülh prosesinin çərçivə səviyyəsində əsas və fundamental məsələlərindən birini - bütün fundamental məsələlərə təsir edən regional kommunikasiyaların açılmasını həll edir:

“Bəyanatın mənası və praktik əhəmiyyəti ondan ibarətdir ki, respublikamızda və bölgəmizdə sülh çox konkret, praktik addımlar vasitəsilə bərqərar olur və bu, artıq praktik reallığa çevrilib. Müharibə məntiqi hələ də dil düşüncəmizdə və ifadələrimizdə çox güclüdür və sülh şüurumuza çox yavaş-yavaş nüfuz edir. Son 35 ilin təcrübəsini nəzərə alsaq, bu, normaldır, amma vacib olan odur ki, artıq sülh üçün sosial-psixoloji əsasın formalaşmasına töhfə verən reallıqlar mövcuddur”.

Paşinyan qeyd edib ki, “Tramp yolu” çərçivəsində əldə edilən razılaşmalar mümkün qədər tez bir zamanda de-yure razılaşmaları kimi rəsmiləşdirilməlidir:

“Müqavilə layihələri və lazımi hüquqi qərarlar üzərində işə başlamalıyıq. Xüsusilə, Ermənistanda TRİPP adlı bir şirkət yaradılmalıdır. Həmçinin marşrutları, inkişaf hüquqlarını, torpaqdan istifadə və tikinti icazələrini müəyyən etməliyik”.