Qarabağ Zəfəri təkcə Azərbaycan üçün deyil, Rusiya müstəmləkəçiliyindən əziyyət çəkən digər xalqlar üçün də tarixi əhəmiyyət​ daşıyır.

Axar.az Teleqraf-a istinadla xəbər verir ki, bunu “İpək Yolu” Mədəni və Tarixi Araşdırmalar İctimai Birliyinin sədri Aida Eyvazlı Göytürk “Mədəni və etnik müxtəliflik: tarixin dərsləri, müasir çağırışlar” mövzusunda keçirilən beynəlxalq konfransda deyib.

A.Eyvazlı Göytürk bildirib ki, Qafqaz xalqlarının yaşadığı soyqırımı və deportasiya faciələri oxşar tarixə malikdir:

“Azərbaycan XIX əsrdə Çar Rusiyasının işğalı ilə üzləşib, 1918-ci ildə müstəqilliyini bərpa etsə də, iki il sonra yenidən sovet işğalına məruz qalıb. Sovet dövründə Zəngəzur və Dərələyəz kimi tarixi Azərbaycan torpaqları Ermənistana verilib, 1937-ci il repressiyaları həyata keçirilib, yüz minlərlə azərbaycanlı deportasiya olunub”.

O vurğulayıb ki, 1990-cı il 20 Yanvar faciəsi və 1992-ci ildə Rusiyanın 366-cı motoatıcı alayının iştirakı ilə törədilən Xocalı soyqırımı Azərbaycan xalqının yaddaşında silinməz iz buraxıb:

“Azərbaycan xalqı başına gətirilənləri unutmadı və milli yaddaşını qorudu. Ermənistanın torpaqlarımızı 30 il işğal altında saxlamasında Rusiyanın dəstəyi mühüm rol oynayıb. Bu gün həmin Rusiya tankları Bakıda Hərbi Qənimətlər Parkında nümayiş olunur. Qarabağ Zəfəri Rusiya müstəmləkəçiliyindən əziyyət çəkən bütün xalqlar üçün ümid və tarixi ədalətin təntənəsidir. Şuşa isə bu Zəfərin rəmzidir”.