Vaxtı ilə Azərbaycanın ən böyük şərab istehsalçılarından biri olan “Fireland Vineyards” MMC-nin (VÖEN – 1301263921) dövlət büdcəsinə 25 min 830 manat 90 qəpik vergi borcu var.

Axar.az Yeniavaz.com-a istinadla xəbər verir ki, “Fireland Vineyards” MMC xammal kimi əsasən Novxanı qəsəbəsində “Duzlu göl” adlandırılan ərazinin yaxınlığında yetişdirilən üzümdən istifadə edib.

“Fireland Vineyards” MMC-nin Novxanıda A.Şıxlinski küçəsində “Marandi Wine Company” adlandırılan şərab zavodu da fəaliyyət göstərib.

Qeyd edək ki, şirkətin təsisçiləri arasında Prezident Aparatının sabiq rəhbəri, AMEA-nın keçmiş prezidenti, dövlət çevrilişinə cəhddə ittiham olunan Ramiz Mehdiyevin həyat yoldaşı, Bakı Dövlət Universitetinin kafedra müdiri, professor Mehdiyeva Qalina Yuriyevna da olub. Əvvəlki illərdə şirkətin vergi borcu faha yüksək olub. Hətta 2021-ci ildə şirkətin vergi borcu yarım milyon manata kimi yüksəlib.

2021-ci ildə “Fireland Vineyards” MMC-yə rəhbərlik edən Səidov Elmar Çingiz oğlu Mehdiyeva Qalina Yuriyevna barəsində məhkəmə iddiası da qaldırıb. Hüquqi ünvanı Yasamal rayonu, Həsənbəy Zərdabi pr., ev 77, m. 40-da yerləşən “Fireland Vineyards” MMC-nin hazırda qanuni təmsilçisi yoxdur.