Ana səhifə Gündəm |
21:51
Oktyabrın 8-də Gürcüstanda keçirilən parlament seçkiləri ilə əlaqədar təşkil olunan eksit-pollun nəticələri açıqlanıb.
Axar.az xəbər verir ki, Gürcüstanın OBQ, GDS, İmedi və Maestro televiziya şirkətlərinin sifarişi əsasında TNS şirkətinin keçirdiyi eksit-pollun nəticələrinə görə, hakim Gürcü Arzusu - Demokratik Gürcüstan Partiyası 53,8 faiz, müxalifətdən olan Vahid Milli Hərəkat Partiyası isə 19 faiz səs qazanıb. Bu nəticələrə əsasən yalnız bu iki partiya parlamentdə mandat əldə edə bilib.
Beynəlxalq GFK şirkətinin keçirdiyi eksit-pollun nəticələri isə bir qədər fərqlidir. Şirkətin yekun hesabatına görə, Gürcü Arzusu səslərin 39,9 faizini, Vahid Milli Hərəkat Partiyası isə 32,74 faizini toplayıb. "Vətənpərvərlər Alyansı" 5,76 faiz, Leyboristlər Partiyası 4,21 faiz, İrakli Alasaniyanın Azad Demokratlar Partiyası isə 3,21 faiz səs toplayıb.
Eksit-poll 220 məntəqədə 10 min seçici arasında keçirilib.
00:28
Oktyabrın 8-də Gürcüstan parlamentinə və Acarıstan Muxtar Respublikasının Ali Sovetinə seçkilər keçirilib.
Axar.az xəbər verir ki, səsvermə səhər saat 8:00-da başlayıb, saat 20:00-da başa çatıb. İlkin məlumatlara görə, seçkilərdə seçicilərin 50 faizdən çoxu iştirak edib. Bununla da səsvermə baş tutmuş hesab olunur.
Lakin bəzi majoritar dairələrdə ikinci turun keçiriləcəyi istisna edilmir.
Səsvermənin ilkin nəticələri oktyabrın 9-da, tam nəticələr isə oktyabrın 19-da açıqlanacaq.
Keçirilən eksit-polların nəticələrinə görə, seçkilərdə ən çox səsi hakim Gürcü Arzusu Partiyası qazanıb.
Gürcüstanın Baş naziri, Gürcü Arzusu - Demokratik Gürcüstan Partiyasının sədri Georgi Kvirikaşvili axşam saatlarında qələbə münasibəti ilə seçiciləri və tərəfdaşlarını təbrik edib. O deyib: "Düzdür, dərc olunan rəqəmlər ilkin hesablamalara əsaslanır. Hamı son nəticəni gözləyir. Amma Gürcü Arzusu Partiyası artıq qalibdir".
Qeyd edək ki, seçki prosesi bəzi detalları ilə yadda qalan olub. Belə ki, Batumidə 83 yaşlı seçici məntəqədə səs verdikdən sonra halı qəflətən pisləşib və o, məntəqədə dünyasını dəyişib.
Gürcüstanın Şida Kartli bölgəsinin Kareli şəhərində isə yaşlı seçici məntəqəyə daxil olduqdan sonra özünü pis hiss edib. Təcili yardım çağırılsa da, həkimlər onun həyatını xilas edə bilməyiblər.
Marneuli rayonunda seçki məntəqələrinin birində seçicilər arasında qarşıdurma yaranıb. Gürcüstanın xüsusi təyinatlılarının müdaxiləsindən sonra vəziyyət normallaşıb.
Zuqdidi rayonunda isə hakim Gürcü Arzusu Partiyasının üzvləri ilə məntəqə seçki komissiyası üzvləri arasında münaqişə olub.
Senaxidə seçiciyə pul verilməsi faktı aşkarlanıb.
Seçki günü Vahid Milli Hərəkat Partiyasının müşahidəçilərinin döyülməsi barədə məlumatlar yayılıb. Ölkənin Daxili İşlər Nazirliyi faktlarla bağlı araşdırmalara başlayıb.
Gün ərzində MSK-ya müxtəlif məzmunlu 81 şikayət daxil olub.
Tarix
2016.10.09 / 00:28
|
Müəllif
Axar.az
|