Xəbər verdiyimiz kimi, “Şanlıurfa Olay” qəzetinin köşə yazarı, Türkiyə vətəndaşı Cəlal Çiftçi tərəfindən Azərbaycanda hakimiyyətin zorla ələ keçirilməsinə yönələn materialların paylaşılması faktları üzrə Baş Prokurorluqda araşdırmalar aparılıb.

Axar.az Globalinfo.az-a istinadla Cəlal Çiftçinin kimliyini araşdırıb və bəzi faktları əldə edib.

1975-ci ildə anadan olan Cəlal Çiftçi jurnalistikaya 1992-ci ildə başlayıb.

Özünün verdiyi məlumata görə, müxtəlif televiziya kanallarında, o cümlədən ŞRT, TV 63 və ATV-də çalışıb.

2005-ci ildə “Şanlıurfa Olay” qəzetini təsis edib, daha sonra Olay Media Qrupunun rəhbəri kimi fəaliyyət göstərib.

2013-cü ildə Şanlıurfada “Özel Celal Çiftçi Anadolu Sağlık Meslek Lisesi” adlı təhsil müəssisəsini yaratdığını bildirib.

2022-ci ildə Türkiyə Prezident Administrasiyasının Kommunikasiya İdarəsi C.Çiftçiyə daimi mətbuat vəsiqəsi verib.

Cəlal Çiftçi 2023-cü ildə Türkiyənin Cümhuriyyət Xalq Partiyasından (CHP) Şanlıurfa üzrə deputatlığa namizədliyini irəli sürüb.

O, Şanlıurfada fəaliyyət göstərən “Şanlıurfa Olay” qəzetinin təsisçisi və Anadolu Media Birliyinin sədr müavinidir.