"Dünya Azərbaycanlılarının Köln Forumu" 2017-ci il fevralın 4-də Almaniyanın Köln şəhərində keçiriləcək.

Bu barədə Axar.az-a Dünya Azərbaycanlıları Assambleyasının prezidenti Rəşad Quliyev məlumat verib. O, 6 saatlıq forumda Almaniyanın siyasi partiyalarının və qeyri-hökumət təşkilatlarının, millət vəkillərinin, Avropanın, eləcə də dünyanın bir sıra beynəlxalq qurumlarının nümayəndələrinin iştirak edəcəyini bildirib.

Forumun ilk iki saatı ərzində Azərbaycan musiqisi, tarixi, mədəniyyəti, mətbəxi, incəsənəti, turistik bölgələri haqqında danışılacaq.

Daha sonra bu il almanların Azərbaycana köç etməsinin 200 ilinin tamam olması münasibəti ilə bu tarixi hadisənin 200 illiyinə həsr olunan film nümayiş olunacaq.

Qeyd edək ki, dünyanın müxtəlif bölgələrində yaşayan həmvətənlərimiz forumda iştirak edə bilər. Bunun üçün aşağıdakı elektron poçt ünvanına müraciət göndərmələri kifayətdir:

[email protected]