Qüds məsələsi belə bir sual ortaya çıxarır: dövlətlər milli maraqlardan çıxış etməlidir, yoxsa beynəlxalq hüquqdan?

Axar.az xəbər verir ki, bu barədə politoloq Nəzakət Məmmədova Qüds məsələsində Bakının strateji tərəfdaşı olan İsraili müdafiə edib-etməməsi barədə polimikalara növbəti münasibətində qeyd edib. Politoloq bir daha vurğulayıb ki, bu məsələdə mütləq beynəlxalq hüquq əsas götürülməlidir:

“Əgər hüququn aliliyi təmin olunmazsa, istənilən cəmiyyət - bu, beynəlxalq münasibətlər sistemi də ola bilər - xaos, anarxiya içərisində boğular. Hüququ gözardı etmək olmaz. Milli maraqlar ikili standartlara yol açır. Biz həmişə bundan narazılığımızı bildirmişik. Bəs özümüzə rəva görmədiyimizi başqasına niyə görək?! Biz bir hadisəyə münasibət göstərərkən qarşındakının dost və ya düşmən olmasına, varlı və ya kasıb, xristian və ya buddist, müsəlman və ya yəhudi olmasına yox, hüququn kimdən yana olmasına baxmalıyıq”.