Ankara məhkəməsi 28 fevral hadisələri ilə bağlı 103 şübhəlinin mühakimə olunduğu məhkəmə prosesinə həmin dövrdə prezident olan Süleyman Dəmirəli şahid qismində dəvət edib.

Axar.az xəbər verir ki, eks prezidentə göndərilən dəvət məktubunda "Türkiyə Cümhuriyyətində hakimiyyəti güc yolu ilə devirməyə cəhd etmiş təqaüddə olan general İsmayıl Haqqı Karadayı və ətrafındakılara qarşı açılan məhkəmə prosesində şahidlik etmək üçün sizi məhkəməyə dəvət edirik", - deyə qeyd olunub.

Məhkəmə göndərdiyi məktubda şahidliyin məcburi olmadığını bildirib. Eks prezident şahid qismində məhkəmədə iştirak etməkdən imtina edərsə, buna zaman yazılı şəkildə məhkəməyə məktub göndərməlidir.

Xatırladaq ki, Türkiyədə 28 fevral hadisələri 1997-ci ildə baş verib. O zaman ordu başçıları Türkiyə qanunlarına dəyişiklik etməklə hakimiyyətə gəlməyə cəhd etmişdi.

Bu hadisəyə görə, 2012-ci ildə Türkiyə Böyük Millət Məclisinin qərarı ilə həmin dövrü araşdıran qrup yaradılmış və bundan sonra bir neçə yüksək rütbəli şəxs həbs olunmuşdu.