Ana səhifə Gündəm |
Bu layihə Azərbaycan üçün prioritet olmaqla yanaşı, həm də Türkiyə üçün vacibdir.
Bu sözləri Axar.az-a Prezident İlham Əliyevin Türkiyənin İzmir şəhərində “Star” neft emalı zavodunun açılışındakı nitqini şərh edən millət vəkili Fazil Mustafa deyib. Millət vəkili bildirib ki, Azərbaycanın Türkiyəyə kapital yatırımı çox önəmli hadisədir:
“Azərbaycan kənar dövlətə deyil, məhz Türkiyəyə yatırım etməklə birbaşa özünə xeyir verir. Bu layihə Azərbaycan üçün prioritet olmaqla yanaşı, həm də Türkiyə üçün vacibdir. Ən önəmlisi isə odur ki, iki dövlətin bir-birinə dəstək verməsi və bir-birinin güclənməsi üçün çalışması həyati əhəmiyyət daşıyır. Ona görə də bu layihənin siyasi və iqtisadi əhəmiyyətini çox yüksək qiymətləndirirəm”.
Millət vəkili Azərbaycan Prezidentinin Türkiyə ilə bağlı siyasətinin çox anlamlı və perspektivli olduğunu vurğulayıb:
“Çünki Azərbaycan qardaş ölkənin imkanlarını genişləndirməklə və özü də müəyyən gəlir qazanmaqla həm də qüdrətli bir türk dövlətinin gəlişməsinə köməklik göstərir. Bu baxımdan da “Star” neft emalı zavodunun açılışı tarixi və sevindirici hadisədir. Dövlət başçılarının açılışdakı isti münasibət isə əsl qardaşlığın, güclü siyasi iradənin təcəssümüdür”.
Qeyd edək ki, Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan ötən gün Türkiyənin İzmir şəhərində “Star” neft emalı zavodunun açılışını ediblər.
Tarix
2018.10.20 / 15:06
|
Müəllif
Aygün Yusibova
|