İranın sanksiyalara qarşılıq olaraq Hörmüz boğazını bağlaması ehtimalı sadəcə cəfəngiyyatdır.

Bunu Axar.az-a rusiyalı politoloq Viktor Nayedin-Rayevskinin İranla bağlı səsləndirdiyi iddianın mümkünlüyü barədə danışan ekspert İlqar Vəlizadə deyib. Politoloq bildirib ki, İrana qarşı sanksiyalar işə düşən kimi dərhal sözügedən iddia da gündəmə gətirilir:

“İran rəsmiləri də ara-sıra bu məsələni qaldırırlar. Ancaq Hörmüz boğazı ilə bağlı səsləndirilən iddiaların İran, yaxud da ABŞ-la birbaşa əlaqəsi yoxdur. Bu boğazdan Küveyt, İraq, Səudiyyə Ərəbistanı, BƏƏ kimi ölkələr də istifadə edir. Hörmüz boğazının bağlaması ABŞ-dan çox, sözügedən ölkələrə zərbə vura bilər. Çətin dönəmdən keçən İranın belə bir qarşıdurmanı gözə alması tamamilə mümkünsüzdür. Üstəlik, indiki dövrdə Tehrana əlavə problem lazım deyil”.

Qeyd edək ki, rusiyalı politoloq Viktor Nayedin-Rayevski İranın sanksiyalara cavab olaraq Hörmüz boğazını bağlamaqla ABŞ-ın iqtisadiyyatına sarsıdıcı zərbə vura biləcəyini bildirib.