Türkiyədəki suriyalı uşaqların məcburi əməyə cəlb edilməsi ilə bağlı jurnalist araşdırması səs-küyə səbəb olub.

Axar.az xarici mediaya istinadən xəbər verir ki, "Quardian" ("The Guardian") qəzetinin araşdırması Avropa ilə bərabər Türkiyədə də reaksiya doğurub.

Uşaqların izinə düşən ingilis jurnalisti Qaziantep, Kilis və Antakyada çox sayda uşaqların işlədildiyini aşkara çıxarıb. Jurnalistin görüşdüyü uşaqlardan bəzilərinin etirafına görə, onlar 40 lirə üçün həftənin yeddi günü, günün 14 saatı işlədilir.

"Qardian" müxbiri görüşdüyü uşaqlar haqqında bu məlumatları verib:

"Antakyada bir sobada çalışan Hələbdən olan 7 yaşlı Həmzə 5 nəfərlik ailəsinə baxmaq üçün həftənin altı günü, az qala, 12 saat işləyir. Atası yaralı olduğu üçün işləyə bilmir, anası dilənçilik edir. Üç qardaşı var. Həmzə, "Mən məktəbə getmək istəyirəm, məktəbi sevirəm, amma yemək üçün pula ehtiyacımız olduğuna görə anam göndərmir. Atam yaralıdır və burada iş tapa bilmir. Həm də burda həyat bahalıdır".

"Mən məktəbə getməyi seçərdim" deyən uşaq 23 ailə üzvüylə birlikdə aylıq kirayəsi 750 lirə olan iki otaqlı bir evdə yaşayır.

Dükan sahibi məmnundur ...

Kilis vilayətindəki ayaqqabı təmiri yerində işləyən 12 yaşındakı Samir Hələb şəhərindəndir. İki il əvvəl Türkiyəyə birlikdə qaçdıqları altı qardaşı, ana-atası və xalasıyla kiçik bir daxmada yaşayır. İki ildir ki, məktəbə getmir və bir qəssab dükanında çalışır. Həftənin yeddi günü, səhər 8-dən hava qaralana qədər ayaqqabı təmiri yerində işləyir, həftədə 35 lirə qazanır. Dükan sahibi isə uşaqlardan yaman məmnunluq edir…

Qız uşaqları da işləyir..

Kilisdəki bir geyim dükanında çalışan 12 yaşındakı Aişə və 13 yaşındakı Xədicə də ucuz işçi qüvvəsi kimi burda çörək pulu qazananlar arasındadır. Xədicə həftənin altı günü işləyir; ayda 200 lirə qazanır.
Gündə 12 lirəyə biskvit satırlar

Biskvit satan 8 yaşlı Mahmud və 12 yaşlı Rıdvan…

İki qardaş gündə 12 lirə qazanır. Ataları Hələbdə öldürülüb.

Rıdvanın ayaqları ayaqqabısının balaca olmasına görə əzilib. Deyir, ayaqqabı alsam, ac qalarıq, məcburam belə gəzim.

"Suriyada ən sevdiyim dərs riyaziyyat idi. Böyüyəndə uşaq həkimi olmaq istəyirdim", - deyir.

Qaziantepdə bir Suriya restoranında çalışan 10 yaşlı Əhməd 8 qardaşın ən böyüyüdür

Ailəsi türkmənlərin yaşadığı kənddən altı ay əvvəl, İŞİD hücumuna görə qaçıb. 40 lirə üçün həftədə yeddi gün 14 saata yaxın çalışır. Son üç ayda yalnız bir gün dincəlib. Həmin günü də haldan düşənə qədər futbol oynayıb. Suriya üçün, məktəbi üçün darıxdığını deyir:

"Yenidən öz məktəbimə gedib öyrənmək istəyirəm. Bəşər Əsədi, IŞİD-i və ya Azad Suriya Ordusunu istəmirəm, sülh istəyirəm, əvvəlki Suriyamı istəyirəm…"

Hər 10 suriyalı uşaqdan biri çalışır

Birləşmiş Millətlər Təşkilatının məlumatlarına görə, Türkiyədəki təxminən bir milyon suriyalının yarısından çoxu uşaqdır. Düşərgələrdə qalan uşaqların 60 faizindən çoxu məktəbə getsə də, düşərgə xaricində yaşayanların 73 faizi məktəbə getmir. Məlumata görə, Türkiyədə hər 10 suriyalı uşaqdan biri işləyir.