Bir neçə gündən sonra Məhərrəm ayının başlanması ilə ölkə ərazisində 40 gün qeyri-rəsmi matəm elan olunacaq. Matəm günlərində bölgələrdə ehsanların verilməsi bu il fərqli ola bilər.

Axar.az-a daxil olan məlumata görə, ölkə ərazisində matəm günlərində ehsan verilməsinə qismən nəzarət olunacaq. Son zamanlar xeyir-şər məclislərində israfçılığın qarşısının alınması üçün görülən tədbirlər məhərrəmlik günlərində verilən ehsanlara da şamil olunacaq.

Xatırladaq ki, Qafqaz Müsəlmanları İdarəsinin (QMİ) sədri Şeyxulislam Allahşükür Paşazadə bu gün keçirilən QMİ-nin Qazılar Şurasının iclasında bildirib ki, dövlət ehsanın əleyhinə deyil və ola da bilməz. Şurada danışan QMİ-nin sədri qeyd edib ki, Quranda bir neçə yerdə ehsan sözü qeyd edilir. Lakin bəzi insanlar bunu düzgün anlamır:

"Xalqımızın mentatlitetində belə bir şey var. Deyirlər ki, nə üçün o ehsan verir, mən verə bilmirəm? Gedir balalarının ruzisini kəsir, ehsan verir. O, Allah üçün ehsan vermir, şeytan üçün verir. Allah-Təala buyurur ki, varındırsa, ehsan ver, yoxundursa, vermə".

A.Paşazadənin yas məsliclərində ehsanın həddindən ziyadə verilməsinə qarşı çıxması matəm günlərində ehsan qadağasının olma ehtimalını artırır.