"İşğalçı Ermənistan Silahlı Qüvvələrinə məxsus hərbi helikopterin vurulmasını Azərbaycanın İrəvana sərt xəbərdarlığı hesab edirəm".

Bu sözləri Axar.az-a açıqlamasında politoloq Fərhad Mehdiyev Ermənistana məxsus hərbi helikopterin mövqelərimizə hücum etmək cəhdinə cavab olaraq məhv edilməsinə münasibət bildirərkən deyib.

Politoloq sözügedən məsələ ilə bağlı Ermənistana iki önəmli mesajın verildiyini bildirib:

"Azərbaycanın bu addımı heç də səbəbsiz deyil. Hesab edirəm ki, Ermənistan tərəfi çoxdandır görməzdən gəldiyi iki ismarıcı artıq aldı. Bunlardan birincisi, Xankəndində aeropotun açılması ilə bağlıdır. Yəni ismarıc ondan ibarətdir ki, əgər belə bir cəhd edilsə, lazımı addım mütləq atılacaq. İkinci ismarıc isə ondan ibarətdir ki, rəsmi Bakı Ermənistanın Azərbaycanın hava məkanında təhdidedici tərzdə manevrlərinə və hava məkanını da işğal etməsinə heç vaxt imkan verməyəcək".

Xatırladaq ki, noyabrın 12-də saat 13:45 radələrində cəbhənin Ağdam rayonunun Kəngərli kəndindən 1700 metr şimal-şərq istiqamətində Ermənistan Respublikası Silahlı Qüvvələrinə məxsus Mi-24 tipli helikopteri döyüş kursuna enərək mövqelərimizə hücuma cəhd edib. Qoşunlarımız tərəfindən açılan atəş nəticəsində düşmən helikopteri məhv edilib.