Heydər Əliyevin rəhbərliyi ilə həmin illərdə Azərbaycanda gedən geriləmənin qarşısı alındı və ölkəmiz üçün dirçəliş dövrü başladı.

Bu sözləri Axar.az-a açıqlamasında millət vəkili Tahir Mirkişili ümumilli lider Heydər Əliyevin 1993-cü ilin 9 iyununda xalqın təkidi ilə Bakıya qayıtması barədə danışarkən deyib.

“Azərbaycanda 1990-cı illərin birinci yarısında iqtisadiyyat tamamilə dağınıq bir vəziyyətdə idi. O dövrdə həm siyasi sahədə, həm də iqtisadiyyatda qeyri-sabit bir durum hökm sürürdü. Bu durumda yerli və xarici investorlar Azərbaycan iqtisadiyyatına investisiya yatırmaq istəmirdi. Ölkə iqtisadiyyatını bu vəziyyətdən çıxarmaq üçün real investitsiya mühiti yaratmaq əsas şərt idi”, - T.Mirkişili bildirib.

Millət vəkili onu da bildirib ki, Heydər Əliyevin uzaqgörən siyasəti sayəsində Azərbaycanda olan problemlər qısa zamanda öz həllini tapdı:

“1993-cü ilin ortalarında, Heydər Əliyev ölkə rəhbərliyinə qayıtdıqdan sonra milli transformasiyanın dördüncü mərhələsi başlandı. “Əsrin müqaviləsi” adlanan məlum neft sazişinin imzalaması ilə ölkə iqtisadiyyatına yatırımların qapısı açılmış oldu. 1995-ci ilin sonlarına yaxın ölkədə ictimai-siyasi vəziyyətin tam sabitləşməsindən sonra iqtisadiyyatın dirçəliş dövrü başlandı. Müstəqillik illərində ilk dəfə olaraq 1996-cı ildən başlayaraq iqtisadiyyatımızda artım tempi qeydə alındı. Əgər 1993-cü ildə Azərbaycan iqtisadiyyatına heç bir xarici investisiya qoyulmamışdısa, artıq 1994-2000-ci illər ərzində bu yatırımların ümumi həcmi 5,5 milyard dollara bərabər idi. 5-6 il ərzində Azərbaycanın ticarət əlaqələri qurduğu ölkələrin sayı və həcmi iki dəfədən çox artdı. Və bu siyasət uzun müddətdir ki, davam edir. Hər bir sahədə, eləcə də ticarət əlaqələri cəhətdən zamanla daha yaxşı nəticələr əldə olunmağa başlayır”.