"Dövlət Torpaq və Xəritəçəkmə Komitəsinin və digər qurumların ləğvi dövlətin idarəetmə sisteminin effektivliyini artırmağa hesablanıb".

Bunu Axar.az-a açıqlamasında son günlərdə Prezident İlham Əliyevin bəzi dövlət strukturlarında islahatlar aparmasına münasibət bildirərkən millət vəkili Zahid Oruc deyib. O, dövlət qurumlarının vahid mərkəzdən idarə edilməsi prosesinin başladığını və bunun davam edəcəyini bildirib:

"Torpaq Komitəsinin ləğvini neftin qiymətinin düşməsi fonunda məcburi ixtisarlar aparmaq kimi qələmə vermək çox yanlış olardı. Çünki 27 milyardlıq büdcə xərclərindən Torpaq Komitəsinə düşən vəsait cəmi 5 milyon dollara yaxın idi. Dövlət Torpaq və Xəritəçəkmə Komitəsinin və digər qurumların ləğvi dövlətin idarəetmə sisteminin effektivliyini artırmağa hesablanıb. Nəzərə almalıyıq ki, daha çox qurumların mövcudluğu bir sıra hallarda təkrarçılığa səbəb olur. Həmçinin ayrı-ayrı funksiyaların müxtəlif qurumlar tərəfindən yerinə yetirilməsi vahid dövlət siyasətini çətinləşdirir. Bu strukturların vahid mərkəzdə birləşməsi vətəndaşların işlərini asanlaşdıracaq. Artıq bu proses başlayıb və davam edir. Mən çox arzu edirəm ki, Meliorasiya və Su Təsərrüfatı Açıq Səhmdar Cəmiyyəti Kənd Təsərrüfatı Nazirliyinə birləşdirilsin. Çünki ölkədə aqrar siyasət KTN hesabına reallaşdırılır. Həmçinin Standartlaşdırma, Metrologiya və Patent üzrə Dövlət Komitəsi İqtisadi İnkişaf Nazirliyinin bir strukturuna çevrilə bilər. Bir sözlə, idarəçilik təkmilləşdirildikcə neft amilindən nisbətən xilas ola biləcəyik".

Qeyd edək ki, fevralın 3-də Bakı şəhəri Vergilər Departamenti, fevralın 5-də isə Dövlət Torpaq və Xəritəçəkmə Komitəsi ləğv edilib.