Prezident sərəncamı əsasında bölgələrə təhvil-təslim üçün gedən "Azərişıq" ASC rəsmiləri "Azərenerji" ASC-nin Şirvan Regional Elektrik Şəbəkəsi idarəsinin əməkdaşlarının əks-reaksiyası ilə üzləşib.

Axar.az-a Şirvandan daxil olan məlumata görə, "Azərenerji" ASC-nin Şirvan Regional Elektrik Şəbəkəsi rəhbərliyi təhvil-təslim prosesinə başlamaqdan qətiyyətlə imtina edib və "Azərişıq" ASC nümayəndələrinə bunu əmrin olmaması ilə izah edib. Artıq iki gündür ki, Şirvana göndərilən nümayəndə heyətinin rastlaşdığı bu qeyri-adi hadisə qarşısında işini icra edə bilmədiyi vurğulanır.

Xatırladaq ki, Prezident İlham Əliyevin sərəncamı ilə 10 fevral tarixində "Bakıelektrikşəbəkə" ASC-nin adı dəyişdirilərək "Azərişıq" ASC yaradılıb və səlahiyyətləri də artırlıb. Belə ki, Azərbaycanın bölgələrində enerji satışı "Azərenerji"dən alınaraq "Azərişiq"a verilib; "Bakıelektrikşəbəkə" isə yalnız Bakı və Sumqayıtda elektrik satışını təşkil edirdi.

Hazırda "Azərenerji" ASC-nin Şirvan Regional Elektrik Şəbəkəsinin bu sərəncamdan irəli gələn vəzifəni yerinə yetirməyə "Azərişıq" ASC nümayəndələrinə imkan verməməsi şok effekti yaradıb.