105 saylı Tovuz seçki dairəsindən deputatlığa namizəd Qənirə Paşayeva bir sıra kəndlərdə ev-ev, məhəllə-məhəllə görüşlərini davam etdirib.

Axar.az xəbər verir ki, Bozalqanlı, Əyyublu, Əlimərdanlı, Dönük Qırıqlı kəndlərində olan Q.Paşayeva şəhid ailələri ilə görüşüb, onların qayğı və problemləri ilə maraqlanıb.

Dövlətimizin hər zaman şəhid ailələrinə dəstək və qayğısından danışan Q.Paşayeva cənab Prezident İlham Əliyevin şəhid ailələri ilə keçirdiyi görüşdən danışıb, bu görüşün bütün məmurlara, millət vəkillərinə, hər bir vətəndaşımıza şəhid ailələrimizə münasibət baxımından nümunə olduğunu vurğulayıb. Q.Paşayeva bildirib ki, şəhid ailələrinin sosial müdafiəsini gücləndirmək və onlara dövlət qayğısını artırmaq məqsədi ilə cənab Prezidentin şəhid ailələrinin mənzil vəziyyətinin yaxşılaşdırılması ilə bağlı verdiyi göstərişləri dövlətimizin şəhid ailələrinə göstərdiyi diqqət və qayğısının bariz nümunəsidir.

Görüş zamanı şəhid ailələri Qənirə Paşayevanın Milli Məclisdə şəhid ailələri, müharibə əlil və veteranlarını narahat edən məsələləri mütəmadi qaldırması, müvafiq qurumlarla müzakirə aparmasını unutmadıqlarını deyərək, Paşayevaya təkrar dəstək və etimad göstərəcəklərini vurğulayıblar.

Q.Paşayeva şəhid ailələrinin dəstəyinin onun üçün mənəvi baxımdan ən böyük dəstək olduğunu bildirib.