Koronavirus pandemiyası dünya siyasətinə də çox ciddi zərbə vurub. İran, İngiltərə, İtaliya, Fransa və başqa ölkələrin bəzi dövlət xadimləri koronavirusa yoluxub. Koronavirusun yaratdığı təhlükə səbəbilə dövlət başçıları və digər rəsmilər birbaşa görüşlərdən imtina edirlər.

Bu sözləri Axar.az-a açıqlamasında politoloq Qabil Hüseynli koronavirus pandemiyası ilə əlaqədar dünya liderlərinin telekonfranslar, virtual iclaslar keçirməsi haqda danışarkən deyib. O qeyd edib ki, hazırda ölkə liderləri başda olmaqla, bir çox diplomatlar, dövlət xadimləri birbaşa görüşlər keçirmir:

“Mövcud vəziyyət diplomatiya sahəsində yeni bir tendensiyanın yaranmasına gətirib çıxarıb. Dövlət başçılarının görüşləri, beynəlxalq tədbirlər telekonfrans və ya digər virtual formada keçirilir. Hətta Böyük Yeddilik (G-7)və G-20 ölkələrinin görüşləri də telekonfrans formatında keçirildi. Bu mənada diplomatiya sahəsində bunu yeni bir tendensiya kimi qiymətləndirmək olar. Düzdür, bu, təhlükəsiz olsa da, düşünürəm ki, birbaşa görüşlərin yaratdığı effekt tamam başqadır. Çünki diplomatiyada bədən dili kimi bir çox nüanslar var. Bu baxımdan fikrimcə, virusun qarşısı alınandan sonra yenidən qarşılıqlı səfərlər təşkil ediləcək və liderlərin birbaşa görüşləri davam etdiriləcək”.

Politoloq Azərbaycan Prezidentinin nazirlərlə birbaşa görüşlər keçirməsini cəsarətli addım olaraq qiymətləndirib:

“Bu, mövcud vəziyyət üçün çox cəsarətli addımdır. Təbii ki, həmin görüşlərdə lazımi təhlükəsizlik qaydalarına riayət edilir. Lakin buna baxmayaraq, ölkə başçısının tapşırıqlarını birbaşa görüşlərlə verməsi önəmli nüansdır”.