09:00

Azərbaycanın sülhpərvər dövlət olması hər kəsə bəllidir. Ölkə başçısı İlham Əliyev də beynəlxalq kürsülərdən dəfələrlə bəyan edib ki, Azərbaycan sülhpərvər ölkədir, lakin bizim də səbrimizin bir həddi-hüdudu var. Hesab edirəm ki, Azərbaycan Silahlı Qüvvələrinin son hərbi təlimləri ona dəlalət edir ki, Ordumuz istənilən an aktiv hərbi əməliyyatlar keçirə bilər.

Bu sözləri Axar.az-a açıqlamasında millət vəkili Elman Nəsirov Azərbaycanın işğal altında olan ərazilərindəki separatçı-terrorçu qurumun “prezidenti”nin “andiçmə” mərasiminin Şuşada keçirilməsi haqqında danışarkən deyib. O bildirib ki, Ermənistan tərəfi heç bir hüquqi normaya məhəl qoymur:

“Ermənistanın Dağlıq Qarabağda yaratdığı qondarma rejimin qanundankənar keçirdiyi “prezident” və “parlament” “seçki”lərinin ardından Şuşa şəhərində andiçmə təşkil etməsi siyasi həyasızlığın pik nöqtəsidir. Ermənistan rəhbərliyi bu addımı atmaqla onsuz da kövrək olan danışıqlara ağır bir zərbə endirmiş oldu. Bundan sonra danışıqların keçirilməsi və bu danışıqlarda Ermənistanın konstruktiv olacağına inam qalmayıb”.

Deputat vurğulayıb ki, ATƏT-in Minsk Qrupunun həmsədr ölkələrinin məsələyə heç bir reaksiya verməməsi də narahatedici məqamdır:

“Əslində, Minsk Qrupunun bundan öncəki bəyanatları da qeyri-adekvat xarakter daşıyırdı. Diqqət etsəniz, həmsədrlərin bəyanatlarında kimin işğalçı, kimin işğala məruz qaldığı qətiyyən bilinmir. Həmsədrlərin məsələyə yerində reaksiya verməməsi Ermənistan tərəfinin arxayınlığını artırır. Ermənistan tərəfinin hüquqazidd əməllərinin cəzasız qalması düşmən tərəfinin daha da cəsarətlənməsinə gətirib çıxarır. Hesab edirəm ki, bu hadisə münaqişənin həlli ilə bağlı prosesə yeni çalarlar əlavə edə bilər. Məsələ ondadır ki, “andiçmə” mərasiminin Şuşa şəhərində keçirilməsi məqsədyönlü bir addımdır. Faktiki olaraq bu addımla İrəvan Azərbaycana qarşı öz aqressiv siyasətindən əl çəkmədiyini bir daha sübut etmiş oldu. Təbii ki, bu hal Azərbaycan ictimaiyyətində çox hiddətlə qarşılandı. Çünki Şuşa azərbaycanlılar üçün olduqca həssas məsələdir. Hətta sosial şəbəkələrdə Azərbaycanın daha ciddi və sərt addımlar atmasının vacibliyi vurğulanır. Vətəndaşların hərbi əməliyyatların başlanmasını təkidlə istəmələri məsələnin nə dərəcədə həssas olduğunu göz önünə sərir. Düşünürəm ki, Azərbaycan diplomatiyası öz hücum taktikasını gücləndirməlidir. Biz bütün istiqamətlərdə ciddi addımlar atmalıyıq”.