Axar.az Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyevin Moderator.az-a müsahibəsini təqdim edir:

- Milli Məclisin yaz sesiyası başa çatdı. Hansı təəssüratla tətilə gedirsiniz? Parlamentə ilk dəfə seçilən deputatlar barədə fikrinizi bilmək də maraqlı olardı...

- Milli Məclis yaz sesiyasını koronavirus pandemiyası dövründə keçirdi və bu, sözsüz ki, bizim işimizə mənfi təsirini göstərdi. Komitə iclasları əsasən videokonfranslar formatında keçirilirdi. Bəzən iclasları tez yekunlaşdırmağa çalışırdıq. Amma bütün bunlara baxmayaraq, bir çox müsbət dəyişiklikləri də qeyd etmək istərdim. Məclisdə təşəbbüskarlıq və sağlam tənqid, həmçinin müəyyən istisnalarla sağlam tənqidə dözümlülük artıb. Deputatlara imkan yaradılırdı ki, seçicilərinin problemlərindən danışa bilsin. Hətta bəzi həmkarlarımız bundan narahatlıqlarını ifadə edirdilər ki, destruktiv qüvvələr problemlərin səsləndirilməsindən sui-istifadə edir. Mənim fikrim bu məsələdə ondan ibarətdir ki, seçici deputatının onun problemlərindən danışdığını görməlidir. Əks halda o, problemlərindən danışılan başqa auditoriya axtaracaq, başqasını öz maraqlarının təmsilçisi kimi görəcək.

Yeni seçilmiş deputatlara gəldikdə isə bəzilərinin iddialı danışması heç kimi narahat etməməlidir, əksinə, sevindirməlidir. Təki onlar yaxşı parlamentar kimi özlərini təsdiq edə bilsinlər. Deputatın işi o olmamalıdır ki, seçicisinin gündəlik qayğıları ilə birbaşa məşğul olsun. Bunun üçün icra orqanları, bələdiyyələr var. Deputat problemlərin nədən qaynaqlandığını öyrənməli, seçiciləri üçün firəvan həyatı, qanunun aliliyini təmin edəcək qanunvericilik bazasının yaradılmasına öz töhfəsini verməlidir. Yeni seçilmiş deputatların əksəriyyəti parlamentin işinə fəal formada qatılıb və bu da bizi sevindirməyə bilməz.