Hazırda ölkədə COVİD-19-a yoluxan aktiv xəstə sayının 1800 nəfərə yaxın olmasına baxmayaraq, gündəlik yoluxma statistikası ilə sağalma statistikası arasında maraqlı tendensiya qeydə alınır. Belə ki, gündəlik yoluxma sayı nə qədər azalırsa, sağalma sayı da bir o qədər azalır. Görəsən, aktiv xəstə 1800-ə yaxın olduğu halda sağalma sayının azalma səbəbi nədir?

Məsələ ilə bağlı Axar.az-a açıqlama verən baş infeksionist Cəlal İsayev bildirib ki, yoluxanlar azaldığı üçün sağalanlar da azalır:

“Nə qədər az adam yoluxarsa, sağalanların sayı da bir o qədər azalar. Hazırda aktiv xəstə sayı 1800-ə yaxındır. Yoluxma sayı 500-dən yuxarı olanda aktiv xəstə sayı da çox idi və sağalanlar təzə dövrdə az idi, amma sonra yavaş-yavaş sağalanların sayı artdı. Elə bir zaman çatacaq ki, sağalanlarla yoluxanların arasında tarazlıq yaranacaq. Yəni nə qədər yoluxma olarsa, o qədər də sağalma olacaq”.

Baş infeksionist yumşaldılmara baxmayaraq, hazırda yoluxma sayında ciddi artım olmadığını bildirib:

“Hazırda yoluxma sayında elə də ciddi artım yoxdur, vəziyyət o dərəcədə də təhlükəli deyil, nəzarət olunandır. Amma ola bilər ki, nəzarətdən çıxa bilər. Bütün hallarda vəziyyətin nəzarətdən çıxmaması üçün karantin davranış qaydalarına əməl edilməlidir. Biz bu qaydalara əməl etsək, yumşaldılmalar qalıcı olar və digər yumşaldılmalar tətbiq edilər. Hərçənd bütün dünyada pandemiyanın ikinci dalğasının baş vermə ehtimalı ilə bağlı hazırlıqlar görülür”.