"Qonağı düşməninə təhvil verməyi bir qafqazlıdan tələb etmək qədər absurd addım çətin ki, olsun".

Axar.az xəbər verir ki, bu fikirlər millət vəkili Fazil Mustafaya aiddir. Deputatın sözlərinə görə, prezident bu jestlə dostuq bağlarının nə qədər möhkəm olduğunu bir daha göstərdi:

"Gürcüstan hökuməti bu ölkənin keçmiş prezidenti Saakaşvilinin ekstradiyasını Bakıdan tələb edir. Hüquqi baxımdan bu tələbin əsaslandırılması mümkündür. Çünki İnterpol xətti ilə axtarışa verilmiş şəxsləri bu quruma daxil olan dövlətlər bir-birinə təhvil verməyə borcludurlar. Əvəzində isə Azərbaycan Respublukasının Prezidenti İlham Əliyev Bakıdakı Foruma qatılmış Saakaşvilini qəbul edib, onunla bağlı qapılar arxasında müzakirə aparır. Gürcüstan tərəfi də dəqiq anlayır ki, Bakı Saakaşvilini təhvil verməz və verə bilməz. Mən bu tələbin siyasi məzmunu barədə hər kəsə aydın məqamlar olduğu üçün nəsə demək istəmirəm. Dünyada hüquq onsuz da siyasətin bir bölümünə çevrilib və son "erməni soyqırımı" adlanan yalançı iddiaları dəstəkləyən Avropa İttifaqı da bunu addımbaşı nümayiş etdirməyə çalışır. Məncə, ölkə prezidenti bu jestlə dostluq bağlarının formal hüquqdan bəzən üstün ola biləcəyini göstərmək istədi. Yəni qonağı düşməninə təhvil verməyi bir qafqazlıdan tələb etmək qədər absurd addım çətin ki, olsun".