Azərbaycan hərbçiləri Zod ərazisinə daxil olmayıb və erməniləri ərazidən çıxmağa məcbur etməyiblər.

Axar.az xəbər verir ki, bu sözləri Ermənistan Baş Qərargah rəisinin birinci müavini Tiqran Xaçatryan deyib.

Xaçatryan bildirib ki, mədənin yerləşdiyi ərazinin yarısı Ermənistan, yarısı isə Azərbaycan ərazisinə düşür. Erməni rəsmisi hətta dövlət sərhədinin mədənin düz ortasından keçdiyini də iddia edib.

“Rusiya şirkəti təhlükəsizliyi təmin etmək üçün ilkin tədbirlər görüb, yola bir nəzarət məntəqəsi qoyulub”, - Xaçatryan qeyd edib.

Onun sözlərinə görə, erməni hərbçiləri həmin mədənin qorunmasında iştirak etməyib:

“Bununla Rusiyanın “Geopromayninq” şirkəti məşğul olur. Azərbaycanlılar çıxmağı tələb etdi, biz də bu barədə ruslara xəbər verdik. Rusların da iştirakı ilə danışıqlar oldu. Danışıqların nəticəsinin necə olduğunu bilmirəm, amma ərazidən bütün hərbçilər çıxdı”.

Bundan öncə Ermənistan MN sərhəddə demarkasiya işlərinə başlanıldığını bildirmişdi.

Qeyd edək ki, bu gün 250 Azərbaycan hərbçisinin, o cümlədən yüksək rütbəli zabitlərin Zod (Söyüdlü) qızıl mədəninin ərazisində peyda olduqları ilə bağlı erməni mətbuatı məlumat yaymışdı. Hətta bununla bağlı video da paylaşılmışdı. Qeyd olunurdu ki, Azərbaycan əsgərləri erməni hərbçilərindən mədənin ərazisini tərk etməyi tələb ediblər.

Onu da bildirək ki, Zod (Söyüdlü) qızıl mədəni Azərbaycanın Kəlbəcər rayonunda yerləşir.

Bu mədəndə 112,5 ton qızıl ehtiyatının olduğu bildirilir.