"Axar.az"ın "APA"ya istinadən verdiyi xəbərə əsasən, "Bizim Yol" qəzetinin əməkdaşı Pərviz Həşimovun ailəsi ilə görüşü, yazışması və istədiyi qəzetlərin ona verilməsi barədə qaldırdığı məsələlərlə bağlı İnsan Hüquqları üzrə Müvəkkilə (Ombudsman) müraciətində göstərdiyi halların araşdırılması məqsədilə Ombudsman Milli Təhlükəsizlik Nazirliyinə (MTN) müraciət edib.

Qeyd edək ki, Azərbaycan Respublikasının İnsan Hüquqları üzrə Müvəkkilinin tapşırığına əsasən, Ombudsman Aparatının əməkdaşları, o cümlədən Milli Preventiv Qrupun üzvü olan həkim 25 sentyabr 2013-cü il tarixində MTN-in Müvəqqəti Saxlama Yeri və İstintaq Təcridxanasında saxlanılan P. Həşimovla görüşüb, saxlanılma şəraiti və vəziyyəti ilə tanış olublar.

Görüş zamanı P. Həşimov saxlanılma şəraiti ilə əlaqədar heç bir şikayətinin, rəftarla bağlı narazılığının və ona qarşı işgəncə halının olmadığını bildirib.

Söhbət zamanı P. Həşimov ona qarşı irəli sürülən ittihamla razılaşmadığını, istintaq hərəkətlərinin sürətləndirilməsini xahiş edib.