2020-ci ilin payızında Azərbaycan öz torpaqlarını işğaldan azad etdikdən sonra dövlətimizin qarşısında yeni reallıqlar yarandı. Bu isə bir sıra sahələrdə dəyişikliklərin və islahatların həyata keçirilməsi zərurətini doğurdu.

Bunu Axar.az-a açıqlamasında politoloq Zaur Məmmədov deyib.

Politoloq dövlətin ən önəmli orqanlarından biri olan Xarici İşlər Nazirliyi strukturunda dəyişiklik və islahatların aparılmasının xüsusi önəm kəsb etdiyini bildirdi:

“Bütün bu proseslərdə xarici siyasətin formalaşdırılmasında və ölkəmizin haqlı mövqeyinin dünyaya çatdırılmasında əsas rol oynayan Xarici İşlər Nazirliyinin mərkəzi aparatında və xaricdəki diplomatik nümayəndəliklərdə islahatların aparılması vacib amillərdən biridir. Elmar Məmmədyarovun istefaya göndərilməsindən və Ceyhun Bayramovun nazir təyin edilməsindən sonra diplomatların yerdəyişməsi müzakirə predmeti idi. Lakin müharibə dövrü, postmüharibə dövrü və onun çağırışları prosesi bir qədər uzatdı. Nəhayət, son vaxtlarda biz bir sıra vacib təşkilatlarda və ölkələrdə nümayəndələrin dəyişdirilməsinin şahidi oluruq. Yeri dəyişən diplomatlar bu dəfə fərqli ölkələrdə öz fəaliyyətlərini davam etdirəcəklər. Sərgilədikləri passivlik səbəbindən geri çağırıldıqdan sonra heç bir yerə göndərilməyən bəzi diplomatların aqibəti isə digər diplomatlar üçün dərs olmalıdır”.

Mütəxəssisin sözlərinə görə, bir sıra diplomatik nümayəndəliklərimizdə, diaspor təşkilatlarında passivlik davam edir və aparılan islahatlarla bu kimi neqativ hallar zamanla öz həllini tapacaq:

“Düşünürəm ki, Xarici İşlər Nazirliyində bundan sonra da islahatlar davam etdiriləcək. Təəssüf ki, hələ də bəzi ölkələrdə passiv fəaliyyət göstərən diplomatlar qalmamaqdadır. Onları zamanla daha məsuliyyətli və aktiv şəxslər əvəz edəcəkdir. Bugün Azərbaycan Prezidentinin apardığı informasiya müharibəsi və informasiya siyasətində diplomatik nümayəndəliklərimiz, diaspor təşkilatlarımız xüsusi yer tutur. Bəzən biz səfirlərlə yerli diaspor təşkilatları arasında anlaşmazlıqların, münaqişələrin olduğunun şahidi olurduq. Bu gün belə neqativ hallar yenə də var. Təbii ki, bunlara son qoyulmalı, Xarici İşlər Nazirliyi, diplomatik nümayəndəliklər və diaspor təşkilatları koordinasiyalı şəkildə birgə fəaliyyət göstərməlidirlər”.

Zaur Məmmədov bundan sonra diplomatiyamızın önündə duran ən mühüm vəzifələrin Azərbaycanın beynəlxalq arenada mövqeyinin güclənməsi və ermənilərin hər cür siyasi təxribatlarının qarşısının alınması olduğunu qeyd edib:

“Qalib ölkə olaraq bundan sonra yenidən güclənən hücum diplomatiyamız dövlətimizin mövqeyinin və xarici ölkələrlə əməkdaşlığın güclənməsinə, bununla bərabər siyasi sahədə erməni təxribatlarının qarşısının alınmasına istiqamətlənməlidir”.