Qərbin sanksiyaları Rusiya dövlətçiliyi üçün təhlükə mənbəyidir.

Axar.az xəbər verir ki, bu sözləri "Tha Question" qəzetinə müsahibəsində Karnegi Fondunun iqtisadi proqramlar üzrə rəhbəri Andrey Movçan söyləyib. Onun sözlərinə görə, Rusiya üçün nəzərdə tutulan 4 inkişaf ssenarisindən 3-ü fəlakətlidir:

"Birinci ssenariyə əsasən, neftin qiyməti 90-100 dollara qədər qalxmalıdır. Bu az inandırıcı məsələlərdəndir. Hadisə belə inkişaf etsə, o zaman Rusiya iqtisadiyyatında yenidən yüksəlmə gedəcək. İkinci ssenari isə neftin qiymətinin daha da ucuzlaşmasıdır. Belə olan halda Rusiyanın rezervləri 4-5 il ərzində bitəcək. Nəticədə ölkə fəlakətin bir addımlığında olacaq. Moskva öz xarici siyasətini dəyişdirib, Qərbdə yeni kapital axtarışına çıxacaq. Bununla da Qərb sanksiyalarını geri götürəcək, Ukrayna ilə müqavilə imzalanacaq. Rusiya 90-cı illərin əvvəllərindəki proseslərə geri qayıdacaq. Üçüncü variant isə neftin qiymətinin ucuzlaşması fonunda Moskvanın üzünü Çinə tərəf çevirməsidir. Nəticədə Kreml faktiki olaraq Çindən asılı vəziyyətə düşəcək. Çin Qərb və Ukrayna ilə danışıqları öz üzərinə götürəcək. Sanksiyalar ləğv ediləcək və Rusiya müstəqil siyasətini itirəcək. Ola bilsin ki, ölkə öz daxili siyasətdə də Pekindən asılı vəziyyətə düşsün. Dördüncü variant isə neftin qiymətinin ucuzlaşmasından sonra Rusiyanın daxili siyasətində sola meyilliliyin artmasıdır. Nəticədə ölkə sənayəsi tam şəkildə milliləşdiriləcək. Bu, əhalinin güzaranının qurban verilməsilə iqtisadiyyatın balanlaşdırılmasına səbəb olacaq. Nəticədə xarici siyasət dəyişməyəcək və sanksiyalar qüvvəsində qalacaq. Bu, ssenarilərin hər birinin öz nəticələri olacaq. Bunların hər biri Rusiya dövlətçiliyi üçün fəlakətə çevrilə bilər".