"Araz" marketlər şəbəkəsi saxtakarlıqda ittiham olunması barədə xəbərlərə münasibət bildirib.

Axar.az-a verilən məlumatda bildirilir ki, vətəndaşın iddia etdiyi kimi, həqiqətən hər birinin qiyməti 60 qəpik göstərilən 2 ədəd "Gillet" üz qırxanlarına kassada 69 qəpik ödənilməsi düzgün deyil və bu zaman vətəndaşın ödədiyi əlavə 18 qəpik marketdə çalışan kassir tərəfindən yerindəcə vətəndaşa geri qaytarılıb. "Araz" martetlər şəbəkəsinin yaydığı məlumatda bu yanlışlıq belə izah olunur:

"Vitrin qiyməti ilə kassa çıxış qiyməti arasında yaranan qiymət fərqində aşağı qiymət götürülərək ödəniş edilir. Marketdə minlərlə çeşid mal olur ki, mütamadi olaraq bunların qiymətlərində qalxma və enmələr baş verir. Bütün bunları gündəlik olaraq tənzimləməyə çalışsaq da, bəzən belə hallar müşahidə olunur. Burada insan faktoru olduğu üçün bu bir texniki xətadır və bu kimi hallar ilə daim mübarizə aparılır".

Müştərinin digər - "Səba" broylerin istehsalı olan və üzərində çəkisi 1.120 qram göstərilən toyuğun çəkisinin marketdə 1.978 qram hesablanması faktını isə market rəhbərliyi qəbul etməyib:

"Marketin Masazır filialında bir neçə müddətdir "Səba" toyuqlarının satış aksiyası həyata keçirilir. Yəni, 2 toyuq alana 1 toyuq hədiyyə edilir. Bu 3 ədəd toyuq isə bir səbətə qoyularaq satılır. Vətəndaşın aldığı 1.978 qramlıq etiket 2 toyuğun çəkisidir. Sadəcə, müştəri buna fikir verməyərək çek vurulan toyuğu götürüb. Onun alt tərəfində isə sadəcə 2 toyuğun çəkisi bir ödəniş edilsin deyə, 1 toyuq qabına vurulur. Üçüncü toyuq isə hədiyyə olaraq verilir. Vətəndaşa bütün bunların izah edilməsinə və ondan üzürxahlıq edilməsinə baxmayaraq, o, bunlara əhəmiyyət qoymayaraq marketi tərk edib".

Xatırladaq ki, "Araz" marketlər şəbəkəsinin Masazır qəsəbəsində yerləşən filialında vətəndaşdan alış-veriş zamanı artıq ödəniş alınması ilə bağlı məlumatlar yayılıb.

"Araz" olayın video-görüntüsünü yayıb və belə xoşagəlməz hallar ilə rastlaşdıqda, müştərilərə marketin rəhbərliyinə və qaynar xəttə (055 525 95 19) zəng etməyi xahiş edib.